I Stac Unis é la nazion plu “enjignoula” tla rei internet
I stac sun l troi dl svilup é tl smendrì la locia digitala anter stac ric y pueresc – La Talia al 28eisem post
(if) Sun l forum dla economia mondiala a Ginevra él encuei (09.12.2003) vegnù prejenté la terza edizion dl”Global Information Technology Report 2003-2004″. Tl “Global Information Technology Report 2003-2004” végnel mesuré desche les economies é enjignedes ca a adoré les tecnologies informatiches y desche ales nen aprofiteia di svilups informatics. La Talia tol ite te chesta classifica clameda “The Networking Readiness” (tant che “ester enjignés a la rei”) l 28-eisem post. Ai prums posc’ giàten i Stac Unis dant Singapur. La Finlandia, denant pruma, tol ite sen l terz post con atira viadedò la Svezia y la Danimarca.
L indesc é metù adum da deplù componentes. La plu emportanta é raprejenteda dal ambient per l anuzament dles tecnologies informatiches. Laprò végnel la desponibelté di grups desvalifs di anuzadours (anuzadours individuai, impreises y govern) a adoré les tecnologies per la informazion y la comunicazion. Al vegn ence tegnù cont desche al vegn anuzé realmenter l internet, l telefon, l fax y l computer. Da chest pont de veduda él vegnù analisé te chest report les 102 economies plu stersces dl mond.
L report preveid per chesta outa, do che tl 2000 él “sclopé la vescia” dl “Dot.com”, contra dutes les tendenzes geopolitiches, n ressanament economich. Ence l setour dla informatica y dla comunicazion nen arà dainciarà da chest miorament economich global.Les azions IT (information tecnology) va endò suvers y ence i investimenc tla infrastrutura informatica dess se remete. N auter resultat che vegn evidenzié tl raport é che i stac sun l troi dl svilup é tl smendrì la locia digitala anter stac ric y pueresc. Deplù informazions pòn giaté a la miscion internet: http://www.weforum.org/
(0)Al ne me plej nia
(0)2 iadesc liet