Gherdeina y l stil tiroleis

La discuscion a Urtijei gnuda fora soura l stil de costruzion dles ciases desmostra ciamò n iade sciche la politica ae gonot perdù l sens dla mesura.

La mozion enstessa à puech sens ajache ala se baseia sun la proposta de costruì te n stil tradizional tiroleis. Cie che n stil tradizional tiroleis é, messessa endere vegnì definì. L president de Ladins Dolomites (LD), Albert Pizzinini, criticheia dassen chesta proposta: „Vigni persona con n pue de cultura, apeina che ala se ciala entourn capesc sciche i stils de costruzion se ae mudé tl temp tles valedes ladines. Les ciases da paur da zacan é fates de pera enfin a la pruma auzeda, spo blot de legn, zenza che al gnissa adoré legnam demé per taflé ju i murs deforavia. Aladò dla mozion messessa endere sen i murs vegnì curis ju con legn. Enteressant fòssel che i autours dla mozion prejentassa n projet de na ciasa tipica tiroleisa (tl stil tradizional alpin), enscì bastàssel fé do dutes les ciases aldò de chesta formera, al gnissa a la fin ence sparagné cosc‘, con bona pesc dla liberté personala, dl progres y dla sconanza ambientala (sun na ciasa te stil tipich alpin ne audìssel nience i panei solars).“
Per LD él d’autri problems plu emportanc: „Jian zeruch a la realté ne él nia chisc i problems con chi che al é da se dé ju.  I problems urbanistics é d’autri, penson a na lege urbanistica puech clera fata de ezezions y na aplicazion nia uniformeda dla medema, a la mancianza de lerch de pertignenza, a la speculazion edilizia, a la mancianza de programazion generala dl teritore, a la dificolté di joegn de ciafé na abitazion che ai se embaste l am de se paié y e.i.
Ladins Dolomites se aoda che an se dae ju danuef con i temesc concrec che enteresseia la popolazion plutost che con propostes populistiches che a la fin di fac é vuetes y ne sta nia en pé.“

{jcomments off}

Al me plej(0)Al ne me plej nia(1)

1058 iadesc liet