Generela: „Ladin dolomitan“ sun les chertes d’identité

En gaujion dla introduzion dla cherta d’identité scrita ence per ladin tol la Union Generela l’ocajion per fé n valgunes consciderazions fondamentales.

Ala la rata perdret dassen positiva, ma la cherta d’identité per ladin mostra endò n iade che al é does categories de Ladins: chi stravardés, che pò gode de chest dert (tla region Trentin-Südtirol), y chi nia stravardés, che ne pò nia s’empervalei (tla provinzia de Belun). La Union Generela aprijassa scialdi sce n partit/moviment politich se dajessa ju per fé a na moda che la cherta d’identité ladina vegnissa slarieda fora ence ai trei comuns ladins tiroleisc dla provinzia de Belun, davia che la premissa legislativa l permetessa bele (l reconesciment di Ladins da ilò tla lege 482/99), y ence a les frazions ladines dl comun de Ciastel, che dess ence ester – aldò dles informazions che roda – scluc fora da chesta novité. N segn dret fort de sie multilinguism dajessa spo l Südtirol sce al slariassa fora la cherta de identité trilinga a duta la provinzia: i ne raton nia che nosc conzitadins talians y todesc essa valch de contra. Y nience i abitanc dla provinzia de Trent ne podessa avei valch contra na cherta d’identité ence ladina sun dut sie teritore. Na soluzion ideala podessa ester la cherta d’identité te trei lingac te duta la region, che fossa ence n reconesciment dles mendranzes todesces di ”cimbri” y ”mocheni” tla provinzia de Trent.
{xtypo_quote_right}Con la soluzion da sen pérel che al sibe trei grups ladins desferenc tla region Trentin-Südtirol (i fascians, chi dla Val Badia y chi de Gherdëina): n “divide et impera” di plu burc.{/xtypo_quote_right}
Dal pont de veduda linguistich ne capesc la Union Generela nia ciodì che sun les chertes d’identité ne végnel nia adoré un n ladin. I ladins dajessa enscì dant si vejins y dant al mond na idea de unité scialdi plu sterscia, y ai fossa plu credibli canche ai porta dant sies domandes y ghiranzes sciche terz grup linguistich. Con la soluzion da sen pérel che al sibe trei grups ladins desferenc tla region Trentin-Südtirol (i fascians, chi dla Val Badia y chi de Gherdëina): n “divide et impera” di plu burc.
{xtypo_quote_left}La Union Generela ti damana a chi che tolarà la dezijion (tl Südtirol y te Fascia) de pensé soura dant che dé chest vare, y de lascé pro l ladin dolomitan sciche lingaz scrit interladin.{/xtypo_quote_left}
En ultima, ne él nience da capì ciodiche tl Südtirol végnel preferì per la cherta d’identité na varieté linguistica che essa da vegnì fora da n compromis anter badiot y gherdeina. Avisa per caji sciche chest y avisa do chel medem prinzip él bele vegnù laoré fora l lingaz de scritura unitar Ladin Dolomitan, che à bele na gramatica, n vocabolar y truepes traduzions fates.
La Union Generela ne é nia bona de capì l vantaje de n lingaz scrit ”ladin-südtiroleis” che sclujessa fora mec i ladins, y perchel refudeiela chesta soluzion, ence ajache ala và contra l prinzip dla colaborazion interladina y dl tegnì adum dl grup linguistich enstes. La Union Generela ti damana a chi che tolarà la dezijion (tl Südtirol y te Fascia) de pensé soura dant che dé chest vare, y de lascé pro l ladin dolomitan sciche lingaz scrit interladin. No demé te chesta ocajion podessa l ladin dolomitan desmostré tant de utl che al é y tant de vantajes che al comportassa.
Per la Union Generela
Dr. Marco Pizzinini

Al me plej(0)Al ne me plej nia(0)

736 iadesc liet