Rejonòven encer l ann 1000 aluesc celtich?
Toponomastica y protostoria: doi ciamps dla scienza deida descuerje ciantons asconus
Da olâ vëgn pa l’inom “Pütia” o “Cëindles” o ci ó pa dí “Juel” , ci à pa da fà le toponim “rin” cun le “Rhein”…. pro tröc toponims ne conëscion nia avisa la provegnënza, mo pro tröc pon ince fà recostruziuns. La toponomastica é na chestiun debatüda politicamënter tla provinzia. Avëi na odüda tlera dla valüta po ma ester de ütl. La Consulta Ladina dl Comun da Balsan inviëia porchël in l’edema che vëgn a en referat che pormët de ester cotan interessant y che daidará stlarí zacotan de domandes, dal titul “Toponomastica y protostoria” cun le dr. Lois Craffonara sciöche reladú.
Craffonara é conesciü sciöche un di majeri esperc sön chësc ciamp. Al á fat en gröm de inrescides tla toponomastica, dandadöt chëra ladina y dl raiun incëria. Valgönes de chëstes é gnüdes publicades tl sföi “Ladinia” y á descedé bindebò de morvëia. Tla toponomastica s’ascógnel nia dainré fostüs de storia dla jënt y dl post “fossilisês” te inoms. Craffonara arata de podëi comprové tres la toponomastica y documënc aministratifs vedli che p.ej. incër l’ann 1000 do Crist rajonân bunamënter ince ciamò celtich tla alta Val Badia y te Fodom. Dui é i toponims che indichëia la poscibilité,
Artesena (na deroiaziun da
art=laûrs por celtich), en raiun danter Piz La Ila y Fodom, plü tert ince nominé Orsara y
rin (=rü tl celtich). Porchël notedeves bele sëgn sö le dé, vëindres ai 6 de dezëmber dales 18.00 tla Ciasa Kolping, str. Ospedal 3 a Balsan y daite tl salf Raiffeisen. L’entrada é gratis.
Al me plej
(0)Al ne me plej nia
(0) 2 iadesc liet
