Fodom: scizeri refondazion

Fodom y Col é tres stedes does comunités de confin che ti secui à abù da scombate con entravegnudes de vigni sort. Da una na pert fova la jent lieda con fedelté a sie signour, al Vescul de Persenon y, davo l 1803, al Tirol; da chela autra cialòvela de mantegnì vifs i contac de comerz con i aunejians. Na val taieda fora dal mond, al confin con l Venet, ma empò tacheda pro l raion de Puster, l daz che messova vegnì paié ben trei iadesc – a San Laurenz, Longega y Corvara -, malandrins che insciautriva dassen la jent, l marciadament con Aunejia y tl medem temp l pericul de na invajion da sot ensù, n clima scialdi rie y les regoiudes melsegures: dut chest à gaujumé tla jent de Fodom y Col na identité daldut particolara, che l‘ à porteda a scombate per fé valei si derc y per otegnì l respet de sies usanzes y tradizions, coche prevedova l statut dla „Herrschaft Buchenstein“. Bele tl 1400 chest statut, mané fora dal Vescul de Persenon, s’à dé ju ence con la defendura teritoriala. Enlaouta i fodoms y chi da Col (i “Buchensteiner”), en cajo de pericul, essa messù jì sot de 50 jenc, mefo che ai ne ova nia da passé via Kollmann, tla val del Isarch. Na integrazion al statut dl 1541 prevedova che vigni fuech ova da mané n el, me che la trupa ova da resté ti confins dl teritore dl Vescul: Blumau, Sterzing y Bornech. Sce i fodoms essa abù da se paré dai aunejians, fòvei enfinamai deliberés da chest dovier. A chisc derc tegniva i fodoms dassen. Vigni outa che l vescul damanova saudés, dova i fodoms da entene che l statut fova da respeté.
I fodoms ova dagnora daidé a defene l paisc dai pericui, cis pa da les invajions che ruvova dal Venet, coche a la fi n dl 1400 y tl 1500. Tl 1647, entant la vera di 30 agn, resulteiel saudés de Fodom (Buchenstein) jus a combate aldefora di confins, a Scharnitz, y tl 1800 na compagnia ladina con fodoms laprò a Zernez (Svizra) y spo a Schwaz. Tl 1809 à l general Peyri abù da se defene adum a si saudés da n clap de fodoms jus a se paré. Dl 1848 végnel metù su na compagnia per defene l confin dai aunejians, enscì ence ti agn 1859 y 1866.
Canche al fova debujen ruvòvel adalerch fascians, maroi y badioc y, tla Pruma Vera, gherdeines a daidé i fodoms a tegnì permez.
Tl 1800 se àl ence slargé fora ta Fodom y Col la tradizion dl tré al taulac (Tré a la sceiba). N taulac é documenté bele tl 1818, ma l é empermò dl 1845 che al ven tres plu pratiché y che ala deventa na dreta tradizion. Da la tradizion di scizeri él nasciù i „Standschützenbataillone“, che é gnus clamés sot tla Pruma Vera. Fodoms y ampezans fova encadrés deberieda tla cuarta compagnia dl „Standschützenbataillon Enneberg„. La fin dla vera à signé ence la fin dla tradizion di scizeri ta Fodom y Col. Tl 2006, do feter 90 agn, é la „Schützenkompanie Buchenstein“ endò gnuda metuda su.

Les fotos pòn engrandì clican lassoura.

Program festal

Sabeda, ai 3 de setember 2011
17.45
Al ruva a La Plié de Fodom les delegazions y la compagnia d’onour „Enneberg“
18.10 Ales se met su te Plaza Nueva de La Plié
18.15 Al vegn anunzié i prejenc a les autorités. Marcia devers dla gliejia ploanala
18.30 Zerimonia te gliejia a memoria y onour di tomés te vera. Al tolarà pert la mujiga da Fodom. Dedò messa sun plaza, pensier comemoratif dl referent ladin Mjr. Günther Obwegs y salut con sclop dant al monument di tomés te vera
20.00 Festa tl tendon de Reba col grop “Die Bergdiamanten”

Domenia, ai 4 de setember 2011
8.30
Al ruva a Reba les delegazions, la compagnia d’onour de Bulsan y les mujighe da Fodom y S. Ciascian
9.00 Al ruva la bandiera dl Bund, an se met su dlongia l ciamp da la glacia
9.15 Marcia sai Plans olàche al vegnirà dit Messa alalergia
9.40 Al vegn anunzié i prejenc a les autorités, al vegn passé en rassegna l aschirament di scizeri y atira do
salut da pert dl capitan y di capocomuns de Col y de Fodom
10.00 S. Messa y benediscion dla bandiera nueva dla compagnia con la partezipazion dla mujiga de Fodom y de S. Ciascian y dla compagnia d’onour de Bulsan. Daldò la funzion paroles de salut da pert di enviés d’onour. Descurs dla storica Dr. Margareth Lun. Marcia devers dl tendon y desfileda (a mandreta).
Da les 12.00 métel man la festa tl tendon con les mujighes de Fodom y de San  Ciascian, da seira sònel “Die Verspielten”

Al me plej(0)Al ne me plej nia(1)

535 iadesc liet

Ortiede inant tres

Scrive n comentar a revert de "Fodom: scizeri refondazion"

Scrive n comentar