Festa ta Mont a Poza con lijendes y recordanzes

Lijendes de Fanes a la “Festa ta Mont”

En sabeda y domenia, 1 y 2 de aost tla Val Sen Nicolò a Poza

Tl cheder dla “Festa ta Mont” che an festejeia tla Val de Sen Nicolò (Poza) en sabeda al 1 y domenia ai 2 de aost, troa na lerch speziala ence l spetacul de teater y mujiga “Stories de Fanes” endrezé dalIstitut Cultural Ladin “majon di fascegn” deberieda con l Ensemble “La Zag” y con la partezipazion de Noemi Iori desche solista y de Giacomo Anderle desche contastories.
La scomenciadiva se tol dant de viventé endò, tres na recostruzion da la saour medievala, la vedla tradizion ladina di contastories che, aldò de cheles pueces recordanzes che ne é nia judes destrabonides tla tradizion, raidova da n paisc al auter, da na ciasa a l’autra, per conté, acompagnés da mujiga, de vedles lijendes y contejes epiches dles Dolomites.Cliché sun l morch per ruvé sun la plata internet che contegn l program avisa.
 

L spetacul vegnirà porté dant tla cornisc demarevueia bela dla Val de Sen Nicolò, sun i pres olàche chesta outa vegniràl fat su n “paisc medieval” a regola d’ert, olàche na gran compagnia de atours en costum che vegn da la Republica Ceca portarà dant mestiers y situazions dla vita da duc i dis a chi temps: veriers, artejans, paurs y lavanderes, y enfinamai na ostaria medievala olàche an podarà ciarcé bevandes y mangiadives desche te chi temps. Te chest contest ruvarà l grup di “Ciantastories”, che anter mujiega y contejes dijarà su stories toutes ca da la contia epica dl Ream de Fanes, cuer dles lijendes dles Dolomites y mit fondatif dl popul ladin, te n crescendo de partezipazion y de pathos naratif.
L spetacul é basé liberamenter sun la revijitazion dla contia epica dl “Ream di Fanes” de Brunamaria Dal Lago Veneri dé fora en l ann passé dal Istitut Cultural Ladin ”majon di fascegn” en colaborazion con Giunti Progetti Educativi, acompagné da les mujighes medievales sonedes dal ensemble “La Zag” y cianties originales per ladin de Fabio Chiocchetti.
L spetacul “Stories de Fanes” é na sort de “prologh” dla raprejentazion de teater plena de sugestions y de enciant che vegnirà metuda en scena de nuet, con la rejia de Erika Kastlunger, en domenia seira ti Plans da l’Ancona, olàche al vegnirà conté dant la storia de Lidsanel, ritadin (arpadour) y ultim eroe dla jent di Fanes.
(eb)

Stories de Fanes
Conties vedlores y cianties dles Dolomites
Spetacul de teater con mujiga per la “Festa ta Mont” – istà 2009
Val de Sen Nicolò

Sabeda e domenia – 1 y 2 de aost
da les 15.30, con:
Ensemble “La Zag”
Noemi Iori – ciantarina
Giacomo Anderle – contastories

“L Regn de Fanes” – Les lijendes dles Dolomites, regoiudes y dedes fora da Karl Felix Wolff al scomenc dl secul passé, à abù bendebot de fortuna che an ne enconta nia valch de valif te deguna autra tradizion narativa dles Alpes. N liber nuef de Brunamaria Dal Lago Veneri.

“Larjei” se clama l liber. Al ne conta nia demé di bosc da leresc, di larjeis che se desten a pert de soredl a pe de Pütia enfin a ju te Vila, ma al conta laprò cotant de scliguc storics y aspec etnografics dla vita da paur ta Lungiarü, na picera val laterala dla Val Badia, olàche i laours y les tradizions da zacan souraviv aluesc dutaorela.

Sun l troi dles conties. L’idea de regueie te n liber doestrei anter les plu beles lijendes loghedes tl Ciadenac vegn cà da la fascinazion che les conties à sun gragn y bec, ma ence dal fat de savei che chestes resta sovenz “sospenudes” te sia dimenjion de flaba, destachedes da la realté y dal teritore che les à cheriedes y olache ales pertegn.

Al me plej(0)Al ne me plej nia(0)

9 iadesc liet

Ortiede inant tres