“A la Court dl Re Laurin”
Teater di buratins te Fascia entratant dut l isté
Anter les manifestazions da d’isté te Fascia él dessegur la scomenciadiva “Alla corte di Re Laurino” la plu apriejeda y chirida su dai bec, sibe da les families di ghesc’ che da la jent de Fascia. La scomenciadiva, envieda via dant da ca. 7 agn con chela de porté dant la cultura dl teater di buratins é deventeda damprovia la maiour manifestazion nazionala de teater de buratins. N suzes chersciù tl temp per merit dla cualité y dla cuantité dles raprejentazions.
Al vegn fat teater almanco does o trei outes a l’edema ti desvalifs paisc de Fascia. N suzes madurì da la colaborazion de duc i comités de manifestazion de Fascia cha à metù adum deberieda dut l program da d’isté y souraldut per la consulenza scientifica de Maurizio Corniani da Mantova, autorité de aut livel te chest ciamp. La setima edizion “Alla Corte di Re Laurino/A la Court de Re Laurin” ti é vegnuda prejenteda chisc dis ai responsabli di comités de manifestazion a Poza endana na scontreda. Al é vegnù metù dant l’emportanza a livel nazional de chesta scomenciadiva y coche chesta medema sie bendebot de moment promozional per l turism de Fascia y n servisc d’utl a les families con mutons. Ence chest ann él gnù dé fora n bel codejel con duc i apuntamenc che é plu de caranta y che ti scincarà entratant dut l’isté te Fascia ai bec, y tamben ai gragn, momenc de orela curta. Al se trata anter l’auter pro n valgunes compagnies o per valch atour, de personajes de renom mondial che al fossa autramenter rie da podei vedei. Senta dles desvalives raprejentazions é souraldut luesc alalergia da seira via te n clima de fascinazion. Sodesfazion da pert de duta la Val de Fascia turistica per chest apuntament, ma sodesfazion ence per Maurizio Corniani per avei metù su te Fascia una dles majeres scomenciadives livel nazional sun chest ciamp. Donca podéssen dì: “Vegnide duc te Fascia per dutes les belezes che al é da vedei ma ence per via che ai bec ti gniràl sport n program teatral plen de buratins”. I programs pòn jì a se tó te duc i ofizes turistics. Domenico Volcan
(0)Al ne me plej nia
(0)1 iadesc liet