Empruma “Te anter i Tobiè”, dedò Gran Festa da d’isté
Does manifestazions folcloristiches che cherda adalerch vigni ann truepa jent
Does les gran manifestazions via per l’isté tl’auta Val de Fascia. La pruma sarà la “Festa Te Anter i Tobiè” a Cianacei che vegnirà tegnuda dai 13 ai 16 de messel y dedò la Gran Festa da d’isté dai 31 de aost enfin a en domenia, ai 3 de setember 2006. Al se trata de does de gran manifestazions liedes a les tradizions, a la cultura materiala y al folclor de Fascia y de duta la Tera Ladina: manifestazions che vuel ester na ocajion per ti fé conesce ai ghesc’ nosta storia y nosta arpejon da mont.
La mascotte “Forgian”.
Te anter i Tobiè (Anter i tablés) sarà desche dagnora trei dis de festa alalergia tl zenter storich de Cianacei. Cotantes assoziazions raprejentarà momenc de vita da zacan
y da encueicondì: na festa plajoula de gran valuta che cherda jent da vigni pert adalerch y che desmostra ence a livel turistich l’emportanza de sporje momenc liés a la cultura y a les tradizions fascianes. Donca cater dis de festa, de mujiga, de folclor y de conescenza dla vita y di laours da zacan. Desche al é tradizion da agn encà a Cianacei végnel do la Gran festa da d’isté endrezeda dai volontadifs dla Crousc Blancia y dai studafuech, semper de Cianacei. Cater dis de festa y de cultura, conesciuda dantaldut per la gran desfileda di grups folcloristics dla Ladinia che empermet na festa da colours che clama vigni ann milesc y milesc de persones a Cianacei a la fin dl isté. Apuntamenc da nia arjumé sibe per i ghesc’ che per nosta jent. (dv)Al me plej
(0)Al ne me plej nia
(0)
(0)Al ne me plej nia(0)3 iadesc liet