Gliejia de Sen Jan: al va debujegn de 1 n milion de euro per l restaur
N laour lonch y zite de ressanament – An spera sun l aiut dla populazion per corì la gran speisa
La Pleif de Sen Jan a Vich, gliejia-mere di fascians vedla de beleche mile agn, à gran debujegn de restaurs. Souradut de renforzament statich, de renové l cuert de scianoles, de tó fora l tume da les fondamentes, de mudé l implant de sciaudament y eletrich y de restaurs di afrescs daite y defora. I souraluesc di tecnics dla Provinzia à confermé l debujegn dl intervent de ressanament, de conservazion y de valorisazion dl maiour monument storich y religious dla Val.
N intervent che, a audì l curat don Erminio Vanzetta, vegnirà a costé passa 1 milion de euro. En chest cont la Provinzia de Trent à aprové la graduatoria di contribuc da aloghé de prescia: la domanda per la Pleif de Sen Jan é vegnuda metuda al 4. post tla classifica di intervenc 2005. N grup slarié fora de profescionisc’ se à metù a laoré per enjigné coche al careneia l delicat y lonch laour de ressanament. Al se trata di architec Maria Stella Marin, Alessandro Tamion y Franco Ghetta, dl geologh Christian Fontana, dl ing. Marco De Giacometti y dl geometer Alberto Carpella. Tla equipe él vegnù damané ence la prejenza dl storich p. Frumenzio Ghetta. Tl prejenté chisc laours fej cont l curat don Erminio, a consaputa dles gran speises, sun l daidament economich da man dla comunanza, ence sce, desche al à sotlinié, “…i feje propi mingol de fadia a l damané. I son segur endere che l afet y la venerazion per la Pleif, maiour testemone dla fé di aves, sarà de stimul per vegnì en socurs a sia conservazion y a sia valorisazion”. (CdP)Al me plej
(0)Al ne me plej nia
(0)
(0)Al ne me plej nia(0)2 iadesc liet