“Varder inant”, esposizion a Cianacei
Enaudazion en doman da seira da les 21.00 – Al vegnirà prejenté entourn 40 chedri con catalogh
Urteda con l’ert y la cultura en doman a Cianacei tla sala grana de Comun a pié via da les 21 da seira. Al vegnirà prejenté la lia culturala nueva “Kultura” con a cef Martino Lorenz da Penia che abina adum n clap de artisc’ fascians. Al sarà ence la gaujion per l’enaudazion dla mostra d’ert coletiva de artisc’ fascians clameda “Varder inant ” che resta daverta enfin ai 21 de messel.
Na urteda che é does outes emportanta ajache al é la pruma dreta ocajion de conesce chest grup d’ert nuef y dapò de podei vedei passa 40 operes de artisc’ en mostra. La lia Kultura é nasciuda per endrez de Martino Lorenz y Meriem Planchesteiner y dl vize president onorar Renato Fuccini da Firenze ma da agn enciasé te Fascia.
Pro i obietifs dla lia nueva aud dantaldut la promozion dl’ert y di artisc’ de Fascia, i contac y engiamesc con d’autri artisc’ dla Talia y da foradecà, l’endrez de coletifs d’ert, la valorisazion dla storia y dla cultura de Fascia, l’endrez de cursc de formazion y ence momenc de valour sozial desche formes de colaborazion con la ciasa de paussa de Fascia. Apede a chest vuel i responsabli de Kultura endrezé per i meisc che vegn mostres d’ert sun artisc’ fascians conescius desche Piero Endrich, Tone Gross y Bepino Soraperra. Ma l grup nuef ne se archieta nia chilò: al é vedù dantfora ence contac con assoziazions artistiches nazionales y internazionales per ti dé l muet ai artisc’ ladins de se fé conesce foradecà y de fé valivamenter conesce storia y cultura ladina de Fascia foravia. A l’enaudazion en doman da seira tolaràl pert autorités de Fascia y foradecà con Renato Ischia, vedl arlef a l’istitut d’ert de Poza y artist trentin de nonze a livel internazional. Per la mostra “Varder inant” él vegnù dé fora n catalogh con les biografies di 35 artisc’ esponidours tla sala de Comun de Cianacei enfin ai 21 de messel 2006. Domenico Volcan.
(0)Al ne me plej nia
(0)2 iadesc liet