La UAL peia endò via con Bepe Detomas
Al é gnù partì su chisc dis les enciaries de partí – Emportant ester unis per arjonje deplù
En mercui da denant (20 de setember) se à enduné l diretif nuef dla UAL (Union Autonomista Ladina) per sourandé les enciaries de partí. Bepe Detomas é gnù reconfermé secreter do che al ova giaté gran creta y plena fidenza dal congres straordinar en chesta aisciuda. Detomas envieia la UAL a fé sies reflescions. Al à trat ca damprovia duc i temesc che ti sta a cuer a la UAL y en general a la comunité de Fascia. Pont ferm resta l sentiment de identité che jia n rodul fondamental pro na mendranza linguistica. Per cie che reverda la politica dla UAL se posizioneiela tl zenter man-ciancia, fat che trueps criticheia tla val, ma Detomas à recordé che les maioures daurides y oportunités é rodunt y demé gnudes da chela pert. Dret en curt à Detomas ence splighé te sie intervent co che l zenter man-ciancia à chest iade messù se prové de abiné litadours tles valedes, olàche an é tendenzialmenter plu orientés devers partis de man-dreta. Plu che vigni autra forza politica endere él propi sté l zenter man-ciancia che à ofrí ocajions de ester prejenc en pruma persona tla vita politica locala, ma ence te chela nazionala.
Cie pò pa fé Fascia te chesta realté moderna olàche dut someia sotmetù a les regoles de competivité? La Val de Fascia, dij Detomas, ne à dessegur nia n eletorat ampl y influent y rodunt perchel méssela cialé de ester dassen unida. Demé sce ala é unida y compata pòla sciacaré con les istituzions y con i esponenc politics te n panorama plu lerch. I fruc de chesta compateza é stés che Fascia à arjont con sies forzes i medems derc dles valedes de Gherdeina y de Badia, che an é stés bogn de lié adum l raion de schi de Poza con l’auta valeda y de mete en pe l lizé nuef a San Jan, te n temp olàche al vegn zenza razionalisé dlonch per sparagné. L lizé vegn frecuenté encuei da entourn sessanta studenc, segn che al é gnù tout su positivamenter.
La UAL se tol dant de rejoné endò de y con sia jent, soura les ideologies di singui partis politics fora, per ester bona de tré endò su y de afermé tla valeda n sentiment de comunité. L envit de Detomas a duta la jent de Fascia é chel de reconesce tla UAL na oportunité, n gran ben al servisc dla comunité che an dess daidé y sostegnì duc deberieda.
Do la reconferma de Bepe Detomas desche secreter él gnù nominé Remo Florian desche president, Guido Anesi desche vize president y dapò Fabio Chocchetti, Lucia Gross y Riccardo Zanoner desche membri dl ofize de presidenza y dla jonta de partí. De chest organism fej ence pert l conseier provinzial ladin Luigi Chiocchetti.
Fascia: senteda dla Union Autonomista Ladina (UAL)- UAL: n moment de crisa do la desfata de Bepe Detomas
- Bebe Detomas: al fova na ocajion storica
(0)Al ne me plej nia
(0)2 iadesc liet