Survey ladins: la situazion linguistica di ladins dles Dolomites
Valutazion di dac statistics relevés sun 3200 persones – L davegnì de na planificazion linguistica interladina
Chest fin de edema, dai 14 ai 16 de setember, gniràl tegnù anter Trent y Vich n convegn linguistich bendebot emportant che valuteia na enrescida statistica sun 3200 persones dles valedes ladines. La enrescida é vegnuda coordineda dal Centre d’Études linguistiques pour l’Europe con la consulenza dla Forschungsstelle für Mehrsprachigkeit de Bruxelles y dl Istitut Cultural Ladin “Majon di Fascegn”.
L fin prinzipal dla archirida é chel de enrescì i comportamenc linguistics dla popolazion che sta tles cinch valedes. Souraldut àn volù definì ciugn che i parentamenc ideai (linguistics y etnich-ideologics) anter les popolazions y ciun che é l sens dl tegnì adum te chesta comunité y i sentimenc de desferenziazion o de afinité de vers dl forest. La conescenza dla situazion linguistica dles valedes ladines é de bendebot de enteres sibe per les scomenciadives de planificazion metudes a jì ma ence per podei paridlé la situazion ladina con chela de d’autres mendranzes.
L Convegn “Survey Ladins” met man en juebia, ai 14 de setember, a Trent y se trasferesc spo i dis 15 y 16 a Vich de Fascia. I reladours rejonarà sun chisc temesc:
Gaetano Berruto: Situazions soziolinguistiches y sconanza di lingac de mendranza. Conscidrazions aldò la Survey Ladins;
Augusto Carli: Glosses soura la Survey Ladins;
Håkan Casares Berg: Galizia y Ladinia: na comparazion soziolinguistica;
Nadia Chiocchetti, Vittorio Dell’Aquila, Luciana Detomas, Carlo Zoli: Les ativités de enrescida y de planificazion tles valedes;
Jeroen Darquennes: Corpus planning y mendranzes linguistiches: na reflescion de linguistica de contat sun l ejempl dl ladin;
Elena Dell’Agnese: L pont dl geografer politich;
Gabriele Iannàccaro: Bases metodologiches dla Survey Ladins;
Vincenzo Matera: Ideologies linguistiches y negoziazions identitaries. L mudament de codesc anter egemonies y marginalité;
Luciana Palla: Enrescida soziolinguistica tles valedes ladines: conscidrazions dal pont de veduda de n storich;
Sabrina Rasom: Idioms ladins: dac linguistics y soziolinguistics a confront;
Marcella Schmidt: Survey Ladins: l pont de veduda dl geograf cultural;
Alessandro Vietti: Domins y contesc’ de doura ti repertores linguistics complesc: tentatifs per na modelisazion statistica;
Glyn Williams: Analisa dles reis comunicatives y limitazions dla doura dl lingaz;
Wolfgang Wölck: La Survey Ladins: na valutazion critica.
(0)Al ne me plej nia
(0)2 iadesc liet