Ernesto Majoni fej propaganda per l no ta Ampez

“Sasto che” al me plej de fé dejinformazion

ERNESTO MAJONI, DIRETOUR DL ISTITUT DI NEO-LADINS DE BOURCIA DE CIADOURA A CEF DE N GRUP DE INFORMAZION PER L NO’

Dì dìjel de ester n grup de informazion, chel de Ernesto Majoni. Bele dant n valgugn agn àl mudé ju “plovania”, jian demez da la union di ladins de Anpezo y se metan adum con i neo-ladins de Belun. Sen él diretour dl Istitut Ladin de Bourcia de Ciadoura. L prum jolantin de does plates de “informazion” per talian-ampezan é vegnù partì fora dantenier sot al titul “Lo sai che/sasto che?”. Grup de informazion végnel dit, ma en verité él clermenter conzepì sciche strument de dejinformazion o de na informazion che peisa dassen devers l “no” al referendum y con l’intenzion clera de semené melsegurtés. L jolantin met bele man con na monzenaria. Sunsom a la lista met Majoni la chestion dles “Regoles Ampezanes”, chela che ti sta plu a cuer ai ampezans: “Sasto che l no n à Regoles?” (te Sudtirol). La scomenciadiva de Ernesto Majoni vegn samben laudeda a ciel dal president dl Venet, Giancarlo Galan.

Sasto Che

Saste che laite ne él nia les Regoles? Saste che laite ne n’él mine segur che con l’autonomia de Sudtirol y dutes les leges che la provinzia autonoma de Bulsan pò se fé, les Regoles vegne mantegnudes con si privilegs y si oblics?

Saste che laite te tocaràl dì de cie grup linguistich che te es (todesch, talian o ladin)

Saste che laite él la proporzionala che partesc fora i posc’ de laour publich o olàche an à da fé con la jent (banches, postes, scoles, ofizes dl govern) conforma a tant de zitadins che se à noté su te vignun di grups linguistics?

Saste che laite – canche per dé fora cuartiers y ciases a bon priesc végnel damané la proporzionala?

Saste che laite – per ciafé n post de laour publich n ladin à da fé i ejams (scrit y a ousc) de trilinguism (todesch, talian y ldin)?

Saste che al é l risch che la jent se mete una contra chela autra (en tanc per jì con Bulsan, d’autri per ne jì nia) y enscì se despartéscela tres de plu?

Saste che laite a mete adum d’autri talians con i ladins (te Ampez él superjù 2.500 ladins y 3.500 talians vegnus da foradecà) vegnìssel metù sotissoura dut l vive di ladins, che da chest essa demé desvantajes?

Saste che … sce te ne sas o te ne capesces nia valch, poste dagnora damané?

c/o Grup de informazion c/o Ernesto Majoni

Tla chestion jia n rodul clef Ernesto Majoni, enstes ampezan y l fenomen di neo-ladins tl Beluneis (passa 30 comuns se à declaré nominalmenter “ladins”), sen unis tl “Istituto dei ladini storici del Bellunese” en contraposizion con i ladins storics. I “neo-ladins” tla provinzia de Belun é n fenomen do rata rezent, cioscé su dantaldut da canche an pò pié do valch contribut, empruma da la Region Venet dal 1983 y spo tres la lege cheder nazionala 482/99, dantaldut con fins folcloristics. Al é n “moviment” che à tout su la definizion “ladin” tl sens linguistich ascolian (ajache al é ti idioms ciadorins y en pert te chi agordins certes caraterstiches definides da Graziadio Isaia Ascoli desche “carateristiches ladines”, p.ej. la palatalisazion), ma nia tl sens cultural-storich-etnich dla parola. Defat se à i trei comuns ladins da souramont, Anpezo, Fodom y Col, dagnora tegnù dassen dancialà da chest moviment, piec ciamò, an à tres endò abù da strité empera. Ti ultims temps se fej tres plu sentí la “aroganza” di 30 comuns. Defat él doi istituc ladins tl Beluneis: chel di neo-ladins de Bourcia de Ciadoura con Ernesto Majoni y chel di ladins storics Cesa de Jan a Col Santa Lizia che ne entrategn endere degugn contac. Apeina che i ladins da souramont se à clamé “ladins storics” per sotligné sia dejaprovazion, à ence l Istitut con a cef Majoni denominé l Istitut te “Istituto dei ladini storici del Bellunese”, piec ciamò ai à tout enfinamai la bandiera ladina te sie emblem che ne à net nia da en fé con ciadorins y agordins y tant demanco con sia storia.

Sen volessa redont Ernesto Majoni, do avei tout la denominazion “ladin” (ence per la revista dl istitut che se clama “Ladin!” con pont de esclamazion enfinamai) y i colours dla bandiera ladina sun l emblem dl istitut, informé obietivamenter la comunité ampezana sun les conseguenzes dl referendum y de n passaje da la region Venet a la region Trentin-Sudtirol.

Duc sà che “les Regoles ” te Sudtirol ne à mefo nia inom “Regoles”, ma che al é de autres definizions per chesta forma de proprieté coletiva desche i la enconton te Ampez: p.ej. les vejinanzes o enteressenzes. Na dejinformazion ence per cie che reverda l ejam de trilinguism: al ne vel nia tles banches y en general nia tla economia privata, ma demé tl emplei publich. Sce an volova informé dret, desche an proclameia, messòven ence enjonté che l trilinguism ti vegn paié y nience tant mel ai empliés publics che é tegnus a rejoné ence ladin y/o todesch dlongia l talian. Ence la lege cheder 482/99 preveid enfinamai portines de chest vers. L medem vel ence per la proporzionala tl emplei publich; i ladins pò avei desvantajes per valch enciaries de aut livel, ma ai à ence de gran vantajes, ajache les ressourses vegn partides su aldò dl grup y ti garantesc a la mendranza chestes ressourses. Chest vel tamben pro l frabiché alesiré. Majoni ciala demé de ti fé tema, de sperde: “Sasto?”, ma les respostes va a pe zot dassen y ne dà net deguna informazion. Sce bilinguism/trinlinguism y proporzionala fossa stés de dann, i éssen dessegur bele desmetus tla provinzia de Bulsan, ma l contrar é veir. An à de gran vantajes empera. Pro n passaje eventual vegnìssel a poura nia chirì soluzions transitories per smonejelé l passaje. Degugn ne à dessegur nia bria da patì per “lingaz” o “proporzionala”, ma da tré valch dancialà. N jolantin alabona, chel de Majoni, crié per semené confujion y dejinformazion. Enluegia de se clamé “grup de informazion” messéssel se clamé giustamenter “grup per l no al referendum”.

Al me plej

(0)Al ne me plej nia

(0)

2 iadesc liet

Ortiede inant tres