ENCRESCIADUM: n some y na lijenda
Prejentazion ensnuet da les 21.00 tl Teater Marmoleda a Cianacei – Fascia
L re “Laurin” dla Enrosadira, depent con na esprescion de ria vueia sun l cuertl dl cd, é un di personajes de “Encresciadum”, la produzion musicala nueva per ladin te chela che al vegn revijité con l uedl de nosc temps les lijendes dles Dolomites che veid i mic che se desfej y l’enrosadira che se sclauresc.
An podessa traduje “enchersciadum” con “nostalgia”, ma l term ne ti corespon nia deplen: encresciadum é plu n “dejider de arciaseda”, a ciasa o a temps passés, “encresciadum” vuel plutost dì valch che an se dejidreia y che an à mancia. Chesta nia-tria esistenziala dla persona ciafa na sia esprescion perfeta tl jazz, te n lingaz musical che à sies raijes tl blues, tles cianties di sclafs, che esprimeia l medem sentiment, sciche la “saudade” oben “l’encresciadum”. N lingaz che à dagnora sapù assimilé y se fé assimilé da les tradizions musicales olàche al é ruvé, che se mesceida empera, ma zenza se confone.
L tema dl dejenciant, dl mit che se desfej, dl re Laurin oramai vedl y zenza ester plu d’utl, che ne pò fé nia auter che bradlé, dla natura che se rebeleia contra i strabac da pert dla persona, dl some do n mond olàche al rej la pesc y la armonia, proponù y svilupé ti tesc’ da pert de Fabio Chiocchetti tres n dialogh decontin con les figures dla tradizion culturala y musicala ladina, à ciafé te Roberto Soggetti n componidour sensibel y entusiast de se mesuré con chisc motifs te na letura plu moderna.
L’interpretazion dles cianties vegn da la ousc de Silvia Donati, artista de origines bologneises, dassen lieda al Brasil y a sia mujiga. Ala desmostra na gran sensibelté y na pronunzia ladina con valch fustia dal portogheis. Ala é steda bona da ti dé dignité artistica internazionala al pice lingaz ladin dles Dolomites. Al ti sta permez Pietro Tonolo (sax), Roberto Rossi (trombon), Paolo Trettel (trumpet), Roberto Soggetti (piano), Marco Privato (double bass) y Enrico Tommasini (drums).
L cd é vegnù realisé tres l deidament dla Fondazion dla Cassa de Sparagn de Trent y Rorei y dl Comprensore Ladin de Fascia.
Prejentazion, sabeda 21 de merz, da les 21.00 – Conzert tl Teater Marmolada, Cianacei
(0)Al ne me plej nia
(0)2 iadesc liet