Majon di Fascegn: rencuré l passé y jì con i temps moderns
Cuer dla ativité dl istitut ti ultims agn é stés i projec entourn a la informatisazion de strumenc linguistics
Senteda anuala dl istitut cultural ladin “Majon di Fascegn” enier domenia tl museo Ladin de Fascia tla sala Heilmann. Na ocajion desche vigni ann preveduda dal statut per ti lascé alsavei a duta la jent l laour fat via per l ann y per ti fé conesce i maiours projec che an se tol dant. Sibe per l mudlon de jent ruvé adalerch che per les autorités ruvedes a la senteda pòn rejoné de na enconteda garateda che à confermé ciamò na outa tant strent che al é l liam anter l teritore, les istituzions y l istitut. Da chest pont de veduda pòn ben dí che truepa ega é regoruda sot i ponc y che l laour fat dal istitut cultural ladin deventa tres majer. Al é n laour che vegn aprijé da la comunanza y n laour che se confronteia con i temps moderns, con internet y con dutes les tecnologies nueves da garat.
La poscibelté de podei tré a nuz les potenzialités de internet é, enscì à dit l diretour Fabio Chiocchetti, na bona basa per resolve problems, zeche che an ne pò nia lascé sun na pert. Da agn laóren pro l projet TALL che é n adum de strumenc linguistics-informatics con coretour ortografich, archif y analisdaour de tesc’, dizionar y banca de dac. Chestes tecnologies nueves pò daidé la jent ladina a scrive plu saurí y miec sie lingaz. L istitut é ence dret atif tl ciamp editorial con audio-libri y dvd che ti dà prestije a la cultura y a la recordanaza storica dla valeda. Entratant l ann 2007 él vegnù publiché n clap de libri: sun Simon de Giulio y Maria Pavarin Piaz y n valgugn libri per mutons. An seghita con l projet informatich “Scrin” olàche al vegn cataloghisé l material museal te passa 15.00 schedes video, audio, fotos y documenc. Sun les ativités dl museum à rejoné plu avisa Daniela Brovodan y Evelyn Bortolotti. L president dla comunité de val, Leonardo Bernard, ti à sport n rengraziament fort al istitut per sie gran laour a ben dla comunanza. Te chesta ocajion él ence vegnù prejenté l “Calender Ladin 2008” che vegnirà tost partì fora te duta Fascia.
Domenico Volcan
|
Strumenc linguistics-informatics on-line dl Istitut ladin “Majon di Fascegn” da garat sun internet – Da enjonté atira pro vosc preferis!!
|
(0)Al ne me plej nia
(0)3 iadesc liet