Enconteda de Mussner con i ombolc fascians

L assessour regional a les mendranzes linguistiches Florian Mussner (Svp) s’á abiné dant valgugn dis con i ombolc di comuns fascians de Moena, Soraga, Vich, Poza, Mazin y Ciampedel tla senta dl Comprensore Ladin de Fascia a Vich.  A l’enconteda á ence tout pert l President dl Comprensore Fascian Fortunato Bernard y l vizepresident dl Consei Regional Luigi Chiocchetti. Chesta enconteda é l’ultima dla “roda” do les vijites a les comunités mochena y zimbra per rejoné empera de problems spezifics di comuns y de projec en doura per na mioura sconanza dles mendranzes linguistiches.

 

Dantfora á Fortunato Bernard rengrazié l assessour Mussner per sia sensibelté devers la Comunité ladina de Fascia y dles mendranzes en general y al ti á sport l benvedú a inom de duta  la valeda. Luigi Chiocchetti é spo ju inant, aratan dret positives de tel encontedes finalisedes a d’ascuté su i raprejentanc dles mendranzes. Al á sotrissé la bona colaborazion envieda via con Mussner entratant chisc prums meisc de legislatura. “L dí de encuei – ál dit – é l ejempl che vegn a caraterisé l laour de chest assessorat ti proscims 5 agn. Deberieda con l assessour Mussner – él ju inant – onse tout la dezijion de endrezé via duc i intervegns y i projec a na maniera de garantí sia continuité ence tla seconda pert dla legislatura canche ie sourantoularé l assessorat”.
I temesc tratés entratant l domesdí fova: l bilinguism te Fascia per cie che reverda i ac aministratifs. Mussner á trat ca l ejempl dla aministrazion publica tles valedes ladines tl Adesc Aut che mess mete ju bele da trueps agn duc i ac aministratifs te trei lingac y á empermetú che la Region se aficiará per slesieré l bilinguism ence pro i ladins trentins.
L ombolt de Soraga Luigi Brunel á damané che al vegne encorajé tl setour dla scola na maiour colaborazion anter Trentin y Adesc Aut, auzan fora l’emportanza di engiamesc culturai y di jomelinajes, ence con comunités fora dla Region. Aziché él spo gnú la chestion dl trafich y la scluta di joufs dolomitans. Chilò á sibe l ombolt de Moena Riccardo Franceschetti co l ombolt de Vich Franco Ghetta sotrissé che al va debujegn de se rejoné fora plu avisa, s’aodan emprumadedut sistems de trasport inovatifs y regionalisés. Remo Florian, l ombolt de Poza, á enultima trat ca la mancianza prest totala de tofles stradales che indicheie la direzion devers la Val de Fascia per chi ti che furneia da Bulsan permez.