Duc aoda n bon ann, ma les previjions dij: 1.000 euros demanco tles families y plu grovaries
Ence tl 2004 se profileiel n enciariment di priesc inflazionar te duc i setours – N capitul nuef dles speises per vignun sarà les “straufonghes saledes”
(if) Al orizont dl ann nuef se profileiel n demendriment dl podei de compra che se la roda anter i 800 y 1000 euros per n nojel familiar con doi davagns. Chest é l dat che resulteia da les previjions per l ann 2004 da pert de Adiconsum, l’union di consumadours che fej archirides merciantiles. L 2004 sarà l ann dl enciariment di priesc te trueps setours: dal setour dles mangiadives a chel bancar, dai viadesc ai afic. En plu ti vegniràl ados a les persones con demé un n davagn y ai pensionés d’autres grovaries finanziares che an sciazeia entourn ai 500-600 euros. Mete averda a les straufonghes sun streda! Ales raprejenteia encueicondì na grovaria scialdi pesocia.
A scomencé con l torcol dl enciariment prozedaràn – desche bele dlonch encundé – ti setours dl trafich local, di trasporc, dl refudam, dl’ega y dles scolines con n aument entourn al 5% enfin al 10%. I nucles familiars messarà entratant l 2004 ence araté ite n enciariment doious di servisc bancars, di afic y dles speises per i viadesc con l avion. L problem dl enciariment tl setour tarifar vegn splighé con i contrac nuefs de laour, con la reduzion di transfers finanziars dal Stat a les provinzies y ai comuns y en general con la caleda dl consum. Les mangiadives, ence sce n pue manco grievamenter, rosiarà ence su i davagns familiars cotant plu che denant. Entratant l 2004 sciazeien te chest setour enciarimenc dal 3 enfin al 5%. L Adiconsum preziseia che an à bele registré enciarimenc dl 3% enfin al 5% tl comerz alangrossa y chisc enciars se trasferesc tert o adora, ma dessegur sun l comerz al detai/al consumadour. Te chisc setours méssen mete dret averda che al ne vegne nia endò fat speculazions; baudi fàlel prest vigni control y straufonghes. Na picia lum de speranza dalonc: l setour dl’energia é chel manco toché da la crisa y l soul con priesc stabils o enfinamai miourmarcé desche per benzin, eletrizité y gas, per merit dl bon tas de engiame anter euro y dolar. Chisc arbasc é endere a rise. L govern vuel i ouje tles casses dl Stat con impone de majeres coutes te chest ciamp. Tla classifica di capitui de speisa per l ann 2004 – tres aldò dles previjions de Adiconsum – messaràn enjonté n capitul nuef a la letra S desche Straufonga. Oramai praticheia trueps comuns na politica dles straufonghes per refé en pert les mendres contribuzions da pert dles provinzies y dl stat.
(0)Al ne me plej nia
(0)1 iadesc liet