DOLOMITES sen reconesciudes desche arpejon naturala dla umanité
Da encuei ence l Regn de Fanes anter la “Arpejon universala dla umanité” – 9 raions dolomitans sot a sconanza UNESCO
L comité dla UNESCO “World Heritage Committee” à tout su ofizialmenter encuei a Sevilla tla Spagna les Dolomites tla lista dles “Arpejons naturales dla umanité”. La candidatura dles Dolomites fova vegnuda maneda inant dal stat y da les provinzies de Trent, Belun, Bulsan, Udin y Pordenon con tratatives duredes plu agn. Nuef é i raions dolomitics che é vegnus amarscés sciche raions de gran beleza naturala che se delada sun na desteisa de apresciapuech 132 mile etars, plu entourn a 85 mile etars de raions a plumac entournvia, ruvan enscì a endut 231 mile etars, partis su sun les provinzies de Trent, Bulsan y Belun, Pordenon y Udin.
Di raions metus sot a sconanza UNESCO fej pert:
1) l grup dl Pelf y Croda da Lago tl Venet anter la Ciadoura, Zoldo y Ampez;
2) la Marmoleda anter l Trentin y l Venet, perauter l crep dolomitan plu aut con 3.343 m y l soul glacier plu emportant;
3) les Pales de San Martin, les Pales de San Lucan y les Dolomites Beluneises, dantaldut tla provinzia de Belun o a confin con l Trentin;
4) les Dolomites Furlanes delà dal Plef, les plu orientales, anter la provinzia de Udin y de Pordenon,
5) les Dolomites setentrionales anter Sudtirol y l Venet con i Ciadins, les Dolomites dl Sest y les Dolomites ampezanes;
6) Fanes, Senes y Braies, anter Venet y Sudtirol; l grup de Puez-Odles sun l teritore dla provinzia de Bulsan;
7) l grup dl Scilier, Ciadenac y Latemar a seida anter les provinzies de Trent y de Bulsan, 8) les Dolomites dl Brenta delà dal Adesc tla provinzia de Trent;
9)l ruf de Blaetterbach (Ruf dles fueies) con si inferns, n canyon demarevueia enteressant, ajache an pò vedei les stricoles de crep y de sedimentazions che conta dla storia dla tera.
Enfin a encuei é demé les ijoles Eolies tla Sizilia vegnudes toutes su tla lista dla “Arpejon universales naturales dla umanité”. Nuef raions dolomitans sen sot a sconanza UNESCO. Sun l retrat: Dolasila te na raprejentazion dles lijendes de Fanes con Susy Rottonara.
(0)Al ne me plej nia
(0)1 iadesc liet