Di di Media Ladins: relazions y discuscions sen sun video

Al “Dì di media ladins”, Ladin standard dlonch desche argoment

Dutes les relazions dl Di di media ladins da vedei sen tres internet sun l sit dla Region

Les relazions y i reladours dl Convegn sun i media a Cianacei pò sen vegní vedus y audis tres internet sun l sit dla Region Trentino-Südtirol, Provinzia Autonoma de Trent, Servisc per la valorisazion dles mendranzes linguistiches. Florian Mussner, conseier y assessour ladin tla provinzia de Bulsan, á porté dant duta sia contrarieté y chela dla SVP devers n lingaz scrit unifiché, depierpul che Luigi Chiocchetti, conseier tla provinzia de Trent y duc i autri á sotlinié l’importanza de n pont de referiment linguistich souralocal, na forma saurida da entene da duc i Ladins, na vedla ghiranza y aodanza tl mond di media ladins. Da man ciancia: l conseier Lugi Chiocchetti, l assessour Mussner y l Intendent dles scoles fascian Bernard.

Entourn al ladin dolomitan/ladin standard pèrel che al se svilupeie ti proscims agn n’autra gran “batalia de prinzip” de cheles che an nen conesc n valgunes ti ultims 50 agn te setours de emportanza vitala per la comunité ladina dles Dolomites, p. ej.: dl 1976 ova la SVP prové de rosedé con n recurs a la Court Costituzionala * l sistem scolastich paritetich (enlaouta con l aconsiadour Franz Demetz), con l fin de porté ite dantaldut scoles todesces tles valedes ladines, tres endò á esponenc SVP combatú contra la prejenza dl ladin te scola; la SVP fova dl 1988 contra l’introduzion dl ladin tles aministrazions publiches* y sia proposta fova todesch y talian a lita; dl 1998 án prové con la lege litala de scluje fora na partezipazion autonoma di Ladins da la politica provinziala * (tres n sbarament lital), tentatif melgaraté naouta n iade, davia che la Court Costituzionala l’á declareda anti-costituzionala y contra les rejons di Ladins. Tla medema spana de temp á i fascians abù n auter svilup, empruma dassen dejavantajés, ái d’en gré via fat varesc inant demé con sies forzes, arjonjan na comunité de val, l’introduzion dl lingaz tles aministrazions, na zircoscrizion litala, na Intendenza a les scoles y e.i.