Durnwalder: “Mussner é mia invenzion”
“Sce i ladins vuel”, ma entratant métel el l raprejentant ladin tla Jonta y ti dá na bela sburla per les lites
Tla intervista dla Usc (23.08.2003) al president dla Jonta Provinziala, dr. Luis Durnwalder (titul: “Sce i ladins vuel”), ál dit clermenter: “Mussner é mia invenzion”. Nia l Svp ladina á abú l’ultima parola y tant demanco la raprejentanza ladina tl Consei tla persona dl dr. Willeit, pro l enscidit “assessour ladin”. Durnwalder se l’à inventé. An á mancia perchel la domanda di redadours dla USC a Durnwalder: “Arateise pa dret che la Svp todescia mete l assessour ladin, praticamenter n auter grup etnich y che al ne sie nia vegnú metú tres n compromis anter la raprejentanza liteda (lista LADINS) y l president dla Jonta?”. Cie valour á pa te chest cheder “Sce i ladins vuel” metú desche titul y dit tant de outes da Durnwalder tla intervista. Sia invenzion, Mussner, enscí l President, á samben dut sie sostegn pro les lites provinziales dant porta, nia demarevueia che al va da piz a cianton y che al pò, olá che al uega, ence ester de mania lergia, sen dant les lites per cie che reverda n finanziament de certes strutures. Al candidat vuelen sen ti dé na dreta sburla. I ladins dess endere mete averda da ne se spaterlé nia via sie davegní politich. La pruma cossa che la Svp fajará, sce al toma na raprejentanza autonoma ladina tl Consei, é la impedí n iade per dagnora con n scialier (lintrin) lital, l gran travert dla Svp, desche ala á bele proé de fé dl 1998 con na lege litala, declareda incostituzionala.
Truepes cosses ne fossa nia vegnudes a se l dé zenza la prejenza dla Lista LADINS, chest miena depierpul l president dla Lista LADINS dr. Mischí, che arata che la prejenza de chesta formazion politica á porté ite cotant de plu moviment sun l parchet politich ladin y che truepes ghiranzes é vegnudes tratedes plu aslum y positivamenter per chesta gauja. L davegní dla Lista LADINS ará na gran importanza, ence dal pont de veduda de liberté de lita y de democrazia.
(0)Al ne me plej nia
(0)1 iadesc liet