Declarazion dl davagn 2006: le 5 por mile al volontariat

Aiut Alpin Dolomites 94026630213

Chest é l numer per ti sporje permez le 5 por mile dles coutes – Na novité fiscala de chest ann che deida organisazions de volontariat

Al é na novité che deida les organisazions de volontariat, les organisazions zenza fin de davagn: tla declarazion dles coutes dl 2006 che reverda les entredes dl 2005 – pò l declarant ti dé le 5 por mile de sie davagn a n’organisazion zenza fin de davagn. L declarant ne paia nia deplù coutes che sc’al ne fej deguna indicazion de chest vers. L zitadin giata a chesta moda la poscibelté de determiné el enstes olache na pert dret picera de sies coutes va.

Na pert picera, ma con l grum pòl ruvé adum somes respetables per les organisazions zenza fin de davagn. I conc pò vignun se fé saurì aladò de sies entredes.
Truepes é les organisazions tla provinzia de Bulsan che à la rejon da giaté n contribut da pert dles persones o dles dites che paia coutes. Ma indiché en pòn demé una. Una de chestes organisazions é l elisocours dl Aiut Alpin Dolomites che pò adoré dret ben n pice sostegn. L Aiut Alpin Dolomites é lié ite tla convenzion dl 118, di aiuc de prescia. Ma la soma che ti vegn paieda da la provinzia per i intervenc n’é nia propi bastan auta, al é demanco al menut che cie che ne fova gnù proponù da esperc (ciuldí damané i esperc, sce an ne respeteia empò nia sia opinion). L contribut al Aiut Alpin Dolomites per i menuc de jol ti vegn dé sun la basa de na dezijion dla jonta provinziala. Tla jonta en él ence de chi che ne ti à mai consentí al Aiut Alpin Dolomites sia ativité, tant manco sie prestige. Perchel adora l’Aiut Alpin Dolomites per podei salvé vites dagnora ciamò l sostegn de privac – sponsours, ma ence persones privates che se fej membri y che s’assegureia y che ti delouj permez le 5 por mile aladò dla novité legislativa.

Mateo Taibon

Tl ciamp aposta méssen dé ite inom y numer de couta: 
Aiut Alpin Dolomites      94026630213

Al me plej(0)Al ne me plej nia(0)

6 iadesc liet