Promozion de leteratura y studes
L Ofize cultura y scola ladina dla Provinzia Autonoma de Bulsan-Südtirol lascia al savei che al é vegnù bandì la pruma edizion dl concurs a pesc’ “Autours ladins scriv …”. L termin per mené ite i laours é enfin ai 30 de dezember 2003. Ala se trata de n pest per la realisazion de operes che à da fé con l mond cultural ladin. Dutes les operes mess ester scrites per ladin de Gherdeina o dla Val Badia, y ne ester mai vegnudes publichedes. Les operes mess souraprò ester scrites a na maniera che ales ne adora degun intervent al fin dla publicazion. Dal concurs végnel sclut fora teses de laurea, traduzions y copies de operes bele publichedes te d’autri lingac. La bandida de chest concurs é vegnuda aproeda tla senteda dla Jonta Provinziala da en lunesc passé sun proposta dl assessour ladin Florian Mussner. Tla medema senteda él ence vegnù metù a desposizion i mesi finanziars per sostegnì chest concurs. Comentar dla redazion al intern.
L concurs preveid does sezions:
- leteratura cunteda (romans, conties);
- essays (studes y enrescides te chisc ciamps: architetura, ert, archeologia, films, mujiga, teater, etnologia, sociologia y storia).
Al concurs pò tò pert persones singules o grups. Duc chi che tol pert mess avei complì i 18 agn. Per vigni sezion végnel nominé 3 vencedours. Chisc pò pié do chisc pesc’:
- prum pest 2.500,00 Euro con publicazion y promozion dl laour;
- secont pest 1.500,00 Euro con publicazion y promozion dl laour;
- terz pest 1.000,00 Euro con publicazion y promozion dl laour.
Presidenta dla giuria che ejamineia les operes é Brunamaria Dal Lago Veneri, scritoura, tradutoura, antropologa, colaboradoura de foliec’ da vigni di y codejiei tl lingaz talian, todesch, ladin con articui de antropologia, critica leterara y teatrala. I autri componenc dla giuria é: Edi Crazzolara da La Ila, Luis Mahlknecht da Urtijei y Maria Cristina Senoner da S. Cristina. I laours mess vegnì menés ite dant i 30 de dezember 2003. Informazions plu avisa dà l Ofize cultura y scola ladina al numer de telefon 0471/26 70 28 o 0471/41 55 00. Les informazions pò ence vegnì dejciariedes ju da internet da la plata: www.provinz.bz.it/intendenza-ladina o damanedes tres e-mail a: katharina.tasser@schule.suedtirol.it .
Comentar dla redazion:
Iniziatives culturales é dagnora da laudé y aprijé, enscí ence chesta dl assessorat. Ma chela de lascé avalei demé i idioms dla Val Badia y Gherdeina, nes per dassen limitatif y reazionar. Te Sudtirol vível ladins de dutes 5 les valedes y storicamenter onse 5 idioms ladins, ultimamenter onse en plu ence la poscibelté de n lingaz scrit unitar, l ladin standard. La politica dl assessorat ne pò perchel nia vegnì oduda de bon uedl, al contrar, davia che ala conduj a na “apartheid ladina” desplajoula y che ne à deguna rejon de ester. Dutes les fontanes normatives importantes, statut de autonomia, leges statales y provinziales, ne rejona iniò de sotidioms ladins, ma dagnora de “ladin”. Spidicé su a chesta maniera i ladins vuel dí endeblì l grup entier. Chest perel che sie l obietif. N auter particolar che i on enrescí: dla comiscion de valutazion fej pert valgugn “fedeliscims” dla Svp. L ex diretour dl Istitut Ladin, Craffonara Lois, che fova ence vegnù damané, ne à nia plu volù tò pert. I envion bele sen eventuai partezipanc de ortié ite si laours te Ladin Standard y de combate a chesta mainiera l’impostazion dla “politica ladina ofiziala”.
(0)Al ne me plej nia
(0)1 iadesc liet