Convenzion per la reforma dl statut

L projet de reforma costituzionala atualmenter ejaminé tl Parlament a Roma à ence atizé na discuscion sun la reforma dl statut de autonomia de Südtirol. Trueps se tem che l’intenzion dl govern de zentralisé y razionalisé l aparat statal comporte na scurteda dles competenzes y dles ressurses finanziares dles provinzies autonomes y perchel se pàrei contra n mudament dl Statut. D’autri veid la situazion manco critica y rata che l statut de autonomia mess a vigni moda vegnì adaté a la situazion d’aldidancuei.
Te chest cheder à l Consei provinzial aprové ai 23 de auril 2015 na lege che met su na “Convenzion por la reforma dl statut d’autonomia dl Trentin-Südtirol”; al se  trata de n organ d’aiut (Hilfsorgan) dl Consei provinzial (cf. http://lexbrowser.provinz.bz.it/doc/la/201949/lege_provinziala_di_23_de_aurì_dl_2015_n_3.aspx?view=1). La Convenzion à l’inciaria da ejaminé n sböz che reverda sides l adatamënt istituzional che les integraziuns che và debojëgn dl Statut d’autonomia, …y da le prejenté al Consëi dla Provinzia autonoma de Balsan”.
Tamben persones privates che enc publics, assoziazions y organisazions enteressedes pò fé domanda de tò pert a la Convenzion. Per garantì na gran partezipazion dla sozieté zivila a la reforma dl Statut végnel istituì anter l auter n “forum” de cent persones che pò tò pert a les discuscions; al é raprejenté tla Convenzion con ot membri. (art. 5). Les prozedures de cerna dles persones y organisazions y les modalités de partezipazion a les discuscions mess ciamò vegnì fates fora dal Ofize de presidenza dl Consei provinzial.
I laours dess pié via ai 16 de jené 2016, sciche àl á encundé l president dl Consei provinzial Thomas Widmann; te na pruma fasa vegniràl chirì fora i raprejentanc dla sozieté zivila che fajarà pert dl “Forum di 100”. Ai 27 de november vegniràl tegnù na reunion publica ti salamenc de EURAC a Bulsan olache l president Widman darà informazions plu menudes sun l prozes de partezipazion dla jent y sun i fins dla Convenzion.
La Convenzion reverda demé Südtirol ma la lege preveid al art. 4 n barat tresfora de minonghes con l Consei dla provinzia de Trent. Dant da puech él vegnù prejenté ence a Trent n projet de lege che preveid l’istituzion de na ”Consulta per lo Statuto speciale per il Trentino-Alto Adige”. Perchel arà i laours dla Convenzion diretamenter o indiretamenter relevanza ence per i ladins de Fascia.
Cie pò pa i ladins se aspeté da la Convenzion? Puech y nia dij i pessimisc’; al sarà na bona ocajion, magari l’ultima, per porté dant les ghiranzes dla jent, dij i otimisc’. Per l moment él efetivamenter rie da capì cie che al pò sauté fora; l tema à abù na ressonanza plutost debla sun i media. Truep depenn da coche la Convenzion sarà metuda adum y da chi che raprejentarà la sozieté zivila.
La lege dij che duc pò se registré y mané ite propostes ma che chestes vegnirà cernudes dal Ofize de presindenza dl Consei provinzial, donca da les autorités politiches. La politica y i partic à donca dutes les poscibeltés de piloté la selezion di raprejentanc dla sozieté zivila, la discuscion y  la cerna dles popostes che la Convenzion ti prejentarà al Consei provinzial; al ne vegn dit iniò che chestes propostes é vincolantes per l Consei. Chi che ti à puecia creta a la politica – al en é trueps – pò ence sospeté che via do chesta iniziativa se asconel na operazion de propaganda per legitimé democraticamenter la posizion  dl govern provinzial dant al  govern y al parlament de Roma.
Ma sciche dit, truep depenn da chi che tol pert a la Convenzion. La pruma condizion per arjonje valch é de tò pert: se scluj fora da la discuscion vuel dì rinunziè dantfora a la poscilbelté de porté dant y fé valei sie enteresc. Perchel dess duc chi che à a cuer l davegnì di ladins – persones privates, lies y assoziazions culturales, soziales  y economiches – se fé inant y damané de podei tò pert a la discuscion, mané ite propostes y ghiranzes y ti sté do ai laours y a les dezijions dla Convenzion. I prums a se fé inant messessa ester les lies che raprejenteia duc i ladins: la Union Generela di Ladins y la Lia di Comuns ladins. La lista dles ghiranzes politiches y culturales di ladins é longia; nia dut podarà vegnì arjont ma sce i raprejentanc ladins se bat con ardiment pòn speré che na pert vegne azeteda da la Convenzion.  Nia tò pert, cialé pro y se baudié spo dedò, vuel dì ti lascé ai autri de dezide per i ladins; al ne é nia rie da s’imaginé de cie vers che al jissa de tel dezijions.
La Convenzion é fosc la pruma y poester ence l’ultima ocajion per i ladins de fé valei ei enstesc siei derc y sies ghiranzes te n prozes de reforma costituzionala. Vignun de nos pò dé n contribut; perchel é duc canc enviés a tò pert a la discuscion sun chest tema ence sun l sit noeles.info, con propostes, comentars y critiches.
Dr. Erwin Valentini
Al me plej(4)Al ne me plej nia(2)

1088 iadesc liet

Ortiede inant tres

Scrive n comentar a revert de "Convenzion per la reforma dl statut"

Scrive n comentar