Mussner: “I é tout personalmenter la dezijion”
Mussner vuel che les unions stime, zenza résteles a pan sut, la politica dl assessorat
Dant Nadel àn podù audì tla televijion ladina na intervista fata da la jornalista Grossi al assessour Florian Mussner persoura l’ativité preveduda dal program de coalizion dl Govern provinzial nuef. Mussner á responù rejonan de strutures per la scola, strutures da porté fosc ence tles valedes. N pice pensier a la cultura zenza lascé entene cie che al miena. Spo àl toché dantaldut sie ciamp spezifich: les stredes. Na picera parola persoura l debujegn de na soluzion dl problem dl trafich su per i joufs. Nience na parola per cie che reverda l gran tema aziché da Durnwalder: l coliament con les autres regions ladines, la “Vernetzung”, l tiesce la teila de liams con les autres valedes y raions ladins.
“Personalmenter éi tout la dezijion de nia paié fora l contribut. Al é sté l’unica lia che ne n’á nia giaté n contribut. Y perchel volessi dì che l mantegnaré ence tl davegnì. I ne veide nia ite dret che persones posse se ascone do a sigles y dì te na tel maniera ju de na persona sciche la mia con robes che n’é nia sovenz dessegur nia veires y con critiches ence nia fundedes. I son gen a desposizion a rejoné con ei, ma dessegur ne firmaréi nia chest contribut.”
Altamo sàn sen clermenter che la cossa é a livel personal. La cultura ne n’á chilò nia da nen fé, ence sce al é dantaldut la cultura ledia, chela descomota, che vegn ciastieda. Perchel sonse dant na dezijion motiveda da emozions personales, che fej de vigni erba n ancei da brujé. Le sit “Noeles.net” á apeina n ann de vita y stuep n’ál mescedé su truep, souraldut tres l forum, ence sce ultimamenter, do na senteda interna dla redazion de Noeles, truep se à mudé. L forum “Stol” todesch é dessegur piour, ma chilò n’á Mussner nia da dì, el vuel demé che i ladins stime, sce no restéi a pan sut.
(0)Al ne me plej nia
(0)2 iadesc liet