Prejentazion de 2 libri – Cornisc musicala con “A per soredl”
La Consulta y la Comunanza Ladina a Bulsan organiseia en mertesc ai 18 de fauré da les 20.00 tl salf “Josef-saal” tla Ciasa Kolping tla streda Ospedel 3 la prejentazion de doi libri fata dai autours enstesc: 1. “Dolomites, pizes magiches” de Hans Pescoller y Alfred Erardi (scrit te 4 lingac), 2. la “Roda dl Temp”, molins da paur dla val da Lungiarù (Val Badia) de Giovanni Mischì y Mario Clara (te 3 lingac). La manifestazion vegn encornijeda musicalmenter dal trio “A per sorëdl” dla Val Badia.
I doi libri é bele vegnus prejentés chest auton tla Val Badia y merita veramenter de vegnì touc en consciderazion y de i conesce.
L prum liber é vegnù metù adum da doi de gragn fotografs: Hans Pescoller y Alfred Erardi.L prum à bele dé fora doi volums fotografics soura la tera ladina y l second à giaté l pest europeich per na sia fotografia che ova sciche argoment l’ega di rufs da mont.
L second liber descriv i molins tla val da Lungiarù y sia importanza per l’economia da zacan y turistica da encuei. Ence chilo n grumon de fotografies persoura i molins y i vedli enjins de Mario Clara y n bel test de spligazion de Giovanni Mischi.
(0)Al ne me plej nia
(0)1 iadesc liet