Roland Demetz á stort la SVP
La Lista Zivica con ombolt y 2 assessours y a la SVP doi assessours chiris fora da Demetz enstes – Defora Diego Bernardi, Christoph Perathoner y Andrea Mussner, i plu lités dla SVP
En mertesc seira á l consei de comun de Selva aprové la jonta nueva y la declarazion programatica prejenteda dal ombolt Roland Demetz: na gran coalizion. Depierpul che a Urtijei él sté la Lista Zivica che s’á stort a la SVP, él sté a Selva la SVP che á messú se storje a la Lista Zivica de Roland Demetz, zenza fóssel sté la poscibelté de jí a lité da nuef. Selva sot Meisules/Sela.Dla jonta fej pert per la lista Zivica l ombolt Roland Demetz y 2 assessours, Heini Senoner (vize-ombolt, portois y trafich), Waltraud Delago (sozial, familia y sanité) y 2 assessours dla SVP, Nadia Nocker (cultura y scola) y Adrian Senoner (paurs y eghes), inoms fac da Demetz enstes. Da pert dl ombolt ne él nia vegnú azeté te jonta l contraent da ombolt SVP, Diego Bernardi y Andreas Mussner, i plu lités dla lista SVP. Defora ence Christoph Perathoner. Tl ciaut dla campagna litala fòvel tomé massa acuses: mec laours fac, degun contat con Bulsan y e.i. Per ti sauridé la coalizion a la SVP ti á Demetz empermetú desvalives enciaries clef te comiscions.
La lista LADINS, prejenta te consei con 3 conseiers, á te chest cheder trat a la curta. Do l scherz doious con l ombolt y sia lista ne fòvel nia plu lerch per ela te jonta.
La jonta nueva é vegnuda criticheda da la Lista LADINS che dij che “con Sëlva é l’ultima jonta liteda zenza la prejenza di LADINS. Propi te chest comun à aministré 10 agn a la longia con suzes pòn dì, propi i LADINS con l medem ombolt da sen Demetz Roland” .”Ciamò n iade”, à dit l conseier Willeit “ne vegn la volenté di litadours nia respeteda y al vegn fat na coalizion politica demé con la SVP propi da pert dla lista zivica che se à destaché dai Ladins per ne fé nia politica. “I LADINS” é enscí, volei o nia volei, tla oposizion y mess se tó su l laour rie ma puech reconesciú de controlé na gran maioranza.
Te sies paroles dantfora à l ombolt de Sëlva samben ence auzé fora la intenzion de tré ite y coresponsabilisé duc i conseiers con enciaries speziales, ma tl medem temp à l capofrazion dla SVP bele rengrazié dles stieres emportantes che sie grup à giaté souraprò ai doi assessorac (enciaries te desvalifs grems comunai y souracomunai desche tl Museum de Gherdeina y e.i). Auzé fora à l esponent dla SVP ence la emportanza particolara dl assessorat per la scola y la cultura che un de si conseiers, la dr. Nocker, à giaté. La lista LADINS, dij che chesta enciaria ti stessa miec pro sia lista te duta Gherdeina, ajache chest moviment ti dá l majer peis a la rejoneda y a la cultura ladina, che é la rejoneda dla oma y l’identité de passa l 80% dla populazion. La lista LADINS dij che la sclujan fora da les jontes án desmostré na gran mancianza de coerenza tla politica culturala di comuns ladins de Gherdeina y che an se à desmentié de sia majera forza y poscibelté che é l patrimone storich y cultural che ti dà ai ladins y a si comuns la viesta y les rejons de na mendranza linguistica nazionala. Ne él mine la renunzia a chesta forza y poscibelté de svilup tl davegní la gauja prinzipala che i LADINS ne fej nia pert dla jonta te degun comun de Gherdeina? se damana la lista LADINS de Sëlva.
Liam a duc i resultac tl detai: Selva
SVP 680 oujes – 42,2% 6 scagns
LISTA di zitadins 678 oujes – 42,0% 6 scagns
LADINS 255 oujes – 15,8% 3 scagns
Al me plej
(0)Al ne me plej nia
(0)
(0)Al ne me plej nia(0)2 iadesc liet