Viade tla Val di Mocheni/Bernstol tl Trentin
Da oláche i crameri vegniva zacan adalerch – An peia via en domenia ai 26 de setember 2004 – Prenotazions pro l president Ivan Lezuo
Do la vijita fata ai raions zimbresc de Giazza y de Luserna dl 2002 à chest auton la Comunanza Ladina pensé de vijité la Val di Mocheni soura Pergine tla Valsugana, olache al viv da plu de 700 agn na mendranza todescia vegnuda ju zacan da l’auta Baviera. La popolazion mochena, endut 2180 abitanc, é enciaseda da la pert a manciancia dl ruf Fersina/Bersnpoch ti 4 paisc de Frassilongo/Garait, Roveda/Oechlait, Fierozzo/Vlarötz y Palù/Palae anter n’auteza che va da 870 a 1330 metri soura l livel dl mer.
L Filzerhof a Vlarötz/Fierozzo, na vedla ciasa da paur, con solé y tet corí de scianoles y lassoura lignores de peres.
La storia dla val fova lieda souradut a l’ativité dles mineores dl fer y dl arjent de proprieté dl Prinz-Vescul de Trent che é vegnudes enultima saredes per gauja che al fova dagnora plu rie da ciavé fora minerai a n priesc da podei vene endertura sun l marcé.
Con la scluta dles mineores à la jent mochena conesciù n temp de ciarestia olà che trueps à messù jì a se tré l vive dalonc da ciasa. Trueps de nos se recorda ciamò i Crameri che vegniva d’invern via ence te nostes vals ladines con na ciaria do su a vene drap, botons y d’auter patuc.
L priesc per tò pert a chest viade (bus+marena+museums) é de 20.00 Euro.
A chest viade é enviés de cuer a tò pert duc i Ladins y i simpatisanc; chi che vuel se anunzié per tò pert é priés de telefoné al numer 0471-952197 de Lezuo Ivan.
Program
da les 8.30 | L bus dla Firma Mahlknecht da Steinegg peia via da la senta dla Comunanza Ladina a Bulsan (Streda Roen n. 6), al va ju per la Val d’Adesc (Autostreda A22) y al ruva enfin a Trent Nord olà che al jirá fora da l’autostreda. Da chilò inant peiel ite y su per la Val Sugana enfin a Pergine olà che al tolarà a manciancia la streda che conduj devers dla Val di Mocheni/Bersntol enfin su a Palù dl Fersina (Palae am Bersntol). |
|---|---|
da les 10.30 | Salut da pert de raprejentanc de “Bersntol” tl salf dl Istitut Cultural Mocheno-Cimber de Palù (Palae) con proiezion de n documentar de ¾ d’ora sun la storia dles does mendranzes. |
da les 11.30 | Vijita a pé al paisc de Palù/Palae olà che an podarà vijité ence la vedla gliejia de S.Madalena fata su entourn al 1500 y logheda sun n col panoramich. |
da les 12.30 | Marena al Hotel Lagorai de Palù/Palae chilò podaràn mangé n menu con spezialités dl post. |
da les 14.45 | Vijita aviseda al Filzerhof tl comun de Fierozzo/Vlarötz; chest mesc fat su entourn al ann 1400 y de gran interes etnografich é vegnù compré y restauré dal Istitut Mocheno-Zimber. |
da les 16.00 | L bus peia via dal Filzerhof, al tourna inaò a Palù, al passa l jouf dl Redebus y al ruva a Baselga de Piné da les 16.30, chilò sun l lech plajoul de Baselga vegniràl sburlé ite na paussa de zirca n’ora. Chi che vuel podarà jì a vijité con l bus l santuar dla Madona de Montagnaga che é ilò dlongia. |
da les 17.30 | L bus peia via da Baselga de Piné, al va jù per Civezzano – Trent y al ruva a Bulsan da les 18.30 pro la senta dla Comunanza Ladina. |
Vita da zacan tl Bernstol
(0)Al ne me plej nia
(0)2 iadesc liet