I conseiers dla SVP y dla Lista Urtijei deserteia la senteda de comun
Al orden dl dí fòvel la projetazion de na zirconvalazion nueva sot chela de Tresval che ne ti scusa nia a la lista Ladins
Enier, ai 9 de setember, é la senteda de comun de Urtijei juda a vuet, al manciova la maioranza. Demé i 3 conseiers dla Lista Ladins che se ova damané la senteda, l ombolt y sie vize, se à prejenté. Duc i autri é restés demez, “sclut ite i assessours che giata n bel assegn de 1.500 euro nec al meis”, desche la lista osserveia.
Adi Demetz, conseier de comun dla lista Ladins a Urtijei.
La astenjion é vegnuda motiveda dijan che la lista Ladins cherda ite massa sovenz sentedes. Chesta contrabat, dijan che 1 o 2 sentedes al meis é plenamenter tl cheder dla normalité, ma per i assessours “superpaiés” de Urtijei pèrel che al sie massa. Dal do-vera encà él la pruma outa che al mancia la maioranza, preziseia Adi Demetz.
L argoment prinzipal al orden dl dì fova na projetazion de na zirconvalazion nueva de Urtijei sot chela esistenta de Tresval, envieda via da la jonta zenza che l Consei é vegnù damané dantfora. Aldò dla lista Ladins se tràtel de n comportament dret grief, aja che bele tl passé él vegnù realisé operes con chest sistem y che da en ultima él vegnù fora cosc’ plu auc, en plu végnel violé l dert y l dovier dl consei de comun y l dert dl litadour.
Aldò dla lista ladins se tràtel pro la zirconvalazion te galaria sot la streda esistenta de Tresval de n projet che ne va nia da realisé per chisc motifs:
1. olà ouje l trafich entant l temp de realisazion che vegn sciazé dai 3 enfin ai 4 agn?
2. Costimenc auc per gauja de n grum de roles che messessa vegnì trapinedes autró;
3. Risch de danns a ciases situedes dret damprò al trat de streda
4. pericul tl caje de regossies (aluvions).
La proposta dla Lista Ladins é chela de fé na galeria pian via dal raion de Setil y che se ruva do l mesc de Minert de na lungheza de za. 1,5 km. I laours de realisazion de chesta opera ne tegnissa nia su l trafich y ne desturbassa nia la vita te Urtijei. La lista Ladins se tol dant de propone te Consei da nuef chesta projetazion.
(0)Al ne me plej nia
(0)3 iadesc liet