Comentar: joufs sarés per pericul da levines

Tres l Superski soura joufs y valedes

ma pistes y joufs sarés da rie temp y trueps sciors a mez troi – A chi che va encantourn con i lifc soura les Dolomites messéssel ence ti vegní garantí de podei arciasé

de Carlo Willeit

Endò n iade à n grum schiadours messù fé na raida cotant longia per ruvé zeruch te hotel: da Fodom fora a Badia enfin a Bornech y inant a Persenon enfin Cluses y spo finalmenter a Selva. Soura 2 ores de viade y apresciapuech 200 euro per l taxi, dessenés y stanc laprò. Da canche al é l Superski suzédel tres endò de chestes “aventures”. I implanc portamont à si orars y i joufs vegn sarés tl caje de pericul da levines. Con chest crei i aministradours de avei ademplí sia responsabelté. Ma ala ne é nia enscí.

I impresars di lifc dl Superski conduj milesc y milesc de jent soura i joufs y les monts; che an ruva te codes y se entardiveia aboc é daldut valch de normal, dantaldut sce al é rie temp y tempieia. Al ne é nia da capí che les levines che met en pericul les pistes pò atira vegní sclopetedes cialà, ma nia ence cheles che met en pericul les stredes. Nia da capí ne él nience che an ne fej nia i laours nezesciars de stravert da les levines, propi per gauja dl gran moviment y ence per les stredes de coliament anter les valedes en general.

Al me plej

(0)Al ne me plej nia

(0)

1 iadesc liet

Ortiede inant tres