Coliament Saltria con Mont de Pana

Coliament Mont de Pana/Saltria Mont de Souc: naouta él da se damané chi che se damana n coliament con implant portamont modern y de gran capazité! Él veramenter la maioranza di gherdeines che se l ghira o végnel prescions da envalgó d’auter?

Denant che an pense a de tel investimenc méssen ti respone a chesta domanda. Dedò él da se damané sce al é zeche da sciché realisé na strutura che comporta n gran intervent tla natura y che é demé de utl al turism invernal depierpul che d’isté scrivéssela numeri cuecens. Ne fóssel nia damiec se lascé tomé ite valch che deide l turism da d’isté che é cotant plu debl? D’invern onse bele prest arjont la capazité mascimala. Volonse mantegnì i segnours che i on y per fé chest adóren n miorament cualitatif. L aument cuantitatif é dejutl tamben per nosta bela contreda che per l mantegniment de nosta cualité dla oferta. Al basta pensé a tant de vedli schiadours che à lascé da jì con i schi propi ajache les pistes é massa plenes. Sce ala và enscì inant se azentarà chest trend ti proscims agn. Chi che se dà ju per la realisazion dl coliament per perfezioné la “Gardena Ronda” sciche al vegn dit y smendrì i schiadours sun la Sella Ronda ne tegn nia cont che per l uedl él dessegur chest coliament dret bel, ma sce al side soura chest fora veramenter atratif per i turisc‘ él da dubité, chest bele demé per la desfarenzia de dificolté anter les pistes y per l raport temp sun pista/temp sun implant portamont. Dl auter vers él l turism estif che à n gran potenzial, potenzial che pò vegnì anuzè zenza chestes gran investizions che comporta n tel gran intervent tla natura y che và contra l’atrativité de nosc raions. L pice plateau de Mont de Pana é valch de rer olàche nia demé i turisc‘, ma ence la jent dl post se tegn su gen. Tla senteda dl consei de Comun de Santa Christina di 31.05.2010 él vegnù definí Mont de Pana da pert de n conseier de comun sciche nosta majera richeza che dess gnì revaluteda, mantegnuda y sconeda. Atualmenter é Saltria y Mont de Pana coliés tres n autobus. Al é dessegur aproprié da mantegnì chest coliament y de l modernisé, ma tres te n contest de sconanza dla natura tl enteres dl turism tamben da d’isté che da d’invern.
Ladins Dolomites

Al me plej(0)Al ne me plej nia(1)

959 iadesc liet