L Dolomiti Superski é n ejempl
Al respon l assessour a la cultura tl comun de Ampez Bruno Dimai
Propi a Cortina d’Ampez, en ocajion de sia ultima vijita ofiziala, ova Luis Durnwalder trat fora l’idea de n consei di dejedot ombolc dla Ladinia. Al fova endere dant les lites tla provinzia de Bulsan y enlaouta fova l’enduneda vegnuda sburleda inant. “I me recorde”, dij l vize- ombolt y assessour a la cultura ladina Bruno Dimai, “che te chela ocajion òven rejoné che la pruma azion de chest consei fossa steda chela de mete su n comité esecutif che essa spo messù porté inant y realisé propostes”. “Mie ejempl ideal de laour per chest consei é l Dolomiti Superski. Cie che chest consorz s’á embasté l am de fé entratant 30 agn tl ciamp di implanc portamont, tocássen da porté ite ti ciamps dl turism, dl’agricoltura y enscì inant. Sce an é a una àn forza, scenò se pérden.”
Chest consei él volù o él demé percie che Durnwalder l vuel?
Dimai: No no. El l’ova demé recordé can che al fova vegnù a n’Ampez. A dì la verité ne onse spo te Jonta de Comun nia plu rejoné, ma sen fóssel ora de tré fora endò l argoment. Dessegur él dut nuef, an messarà pié via da zero. Al fossa emportant che an ruve a mete en pé valch che deide sfruté i finanziamenc europeics. I me aode ence che chesta strutura ne sceche nia zachei. Per chest ne vedessi nia mel che i trei presidenc dles provinzies de Belun, de Trent y de Bulsan se enconte dantfora, coche al fova ence vegnù dit y che ei rejone de chest.
La Generala, éla destineda a resté te n piz?
Dimai: La Generela à fat truep te duc chisc agn de ativité y chest toca de vegnì reconesciù y ala mess jì inant. Ala podarà avei sia lerch te dutes les chestions che auda pro la cultura, entratant che l consei di ombolc se cruziarà de dutes les autres chestions istituzionales. Al basta demé se senté entourn a na meisa y de se mete a una.
Podarà chest consei influì sun la chestions de l’unificazion dii Ladins?
Dimai: Al depen da coche les cosses jirà. Sce an ruvarà a laoré endretura y la jent veid che stan adum davágnen, madurirá fosc plu inant i temps per n’union ciamò plu strenta.
Ciun é pa vosta posizion ti confronc dl lingaz scrit unifiché?
Dimai: Sce i rejonon de codesc unifiché da adoré per mete ju documenc unitars a livel aministratif, spo sonsi a una, do l ejempl di Grijons. Per l rest sonsi dla idea che vigni val mess mantegnì sie descore. Chesta creii che sie l dret pont de forza dles mendranzes, l descore desferent. I messon laoré per l mantegnì vif, percie che coche an veid con l’influenza dl turism sonse do a l perde.
Ciugn podessa pa ester i prums ciamps de coliament anter les provinzies,olà scomencé a laoré adum?
Dimai: Dessegur chel dla promozion turistica che porta a conesce a livel internazional nostes Dolomites.
Y per cie che reverda i finanziamenc ai mass media ladins?
Dimai: Lascion fora la politica che rejona de chest argoment y spo vedareise che an ruvarà a se mete a una.
Lorenzo Soratroi.
(0)Al ne me plej nia
(0)1 iadesc liet