La Lia da Mont de Cianacei y l program 2006
Ai 25 de jugn enduneda dles Lies da Mont dla Ladinia su da la utia de Croda da Lago-Palmieri
Anter les Lies da Mont plu feruscoles de Fascia él dessegur chela dl’Auta Fascia la plu ricia de programs y de ativités, chest dit samben zenza volei ti tò zeche a les autres lies da mont dl zenter Fascia y de Moena. An pò dì che la sezion dl’Auta Fascia à da passa 30 agn dagnora cialé de porté dant n calender plen de scomenciadives a na vida de tò ite tres deplù sozes che arjonj encueicondì la bela cumpeida de 250.
La utia Croda da Lago Palmieri é logheda nia dalonc dal lech plajoul de Federa sot ai pareis dla Croda da Lech y dl Bech de Mesdì tles Dolomites Ampezanes.
La Lia da mont de Cianacei desmostra da tres n liament y n sentiment fon per i ideai dl’arpejon da mont, di creps ma ence y souraldut per dut cie che reverda la cultura materiala dles Dolomites y dla tera de Fascia. Dant da puec dis él vegnù fora l calender nuef con l program dles raides sa mont per la sajon da d’isté-auton 2006 y per l invern: ciamò na outa n program rich metù adum da cotantes raides sa mont, ma ence da autres manifestazions liedes a la promozion culturala de Fascia, de sia cultura ladina y de sies tradizions. Da recordé plu avisa: la sezion dl’Auta Fascia tolarà pert ai 25 de jugn da les 14.00 a la enduneda dles Lies Ladines da Mont su da la utia Croda da Lago-Palmieri y dedò, ai 2 de messel 2006 daidaràla a endrezé via la seconda edizion dla garejeda de sauté sa mont “Plan Trevisan-Plan dei Fiacconi”.
L grup da mont sarà dapò ciamò na outa n prezious promotour en gaujion dla festa “Te anter i Tobiè” a Cianacei dai 14 ai 16 de messel. Chesta é na enduneda emportanta per duta la val de Fascia y na ocajion per ti fé conesce ai ghesc’ storia y tradizions locales.
L laour di volontadifs dl CAI-Sat Auta Fascia sarà dret d’utl y la vedla ciasa de Zapin a Cianacei deventarà endò na fujina de ert, de leteratura y de saours da zacan.
Na autra enduneda emportanta sarà plu inant la Festa di “Omign da mont” l dì de Santa Maria Maiour a Ciampedel y la bela raida da d’auton tl Abbruzzo sun la Majella y l Gran Sasso. Apede al program rich él endere ence valch problems liés a la partezipazion di bec y di plu joegn a les ativités dla Lia. Al é n problem festidient che, sce al ne ruvarà nia a na soluzion tl temp, portarà l CAI Sat Auta Fascia a d’avei problems generazionai y de forzes nueves per jì inant. Te chest ciamp jiràl debujegn de laoré dassen per ti asseguré n davegnì a chesta Lia da Mont che adum a les autres de Fascia é dret preziousa per gode adum les belezes de nosc creps. Domenico Volcan.
Liams a les plates internet:
Al me plej
(0)Al ne me plej nia
(0)
(0)Al ne me plej nia(0)1 iadesc liet