Na plata de storia che duel dutaorela – letures “Tu jiras su per ciamin”
Scomenciadiva dla biblioteca comunala de Cianacei per recordé la “Shoah” ai 23 de jené tla Majon di libres
Devers la fin de jené y ite per i prums de fauré endreza via la Provinzia Autonoma de Trent per muet dl servisc cultural provinzial n zacotant de scomenciadives a recordanza dla “giorneda dla memoria”, na plata encherscioula di ciamps de conzetrament nazisc’, la recordanza dla Shoah.
Riccardo Löwy, judier vieneis, che ova chirì aiut pro la jent de Moena.
Te Fascia végnel metù a jì da la Provinzia deberieda con la biblioteca comunala de Cianacei, en mertesc ai 23 de jené, na seira de preletura tla sala dla majon di libres tla streda Dolomites. Al sarà na seira de poejia y de conties lietes dant dal contaconties Alfonso Masi de Trent. Al liejarà toc de Primo Levi, de Peter Weiss, de Elie Wiesel, de Elisa Springer, de Frediano Sessi y de d’autri autours che a conté ti libres chesta storia dolorousa di “lagers” nazisc’ y di passa sies milions de judiers sassinés. Canche an rejona de Olocaust, ruva te Fascia l pensier atira al enjignier Riccardo Löwy y a sia familia sassineda te n ciamp de conzentrament nia conesciù. Löwy fova dassen lié al paisc de Moena ciamò da la pruma vera encà canche al fova sté ofizier dl’armeda austroungarica. Endana chela vera òvel fat truep a ben dla jent de Moena: con chest om y ofizier, dedò proclamé zitadin ononar, à Moena abù n liam fon. Endana les persecuzions contra i judiers a Viena é Riccardo Löwy sciampé a Moena tla speranza de podei se mete a salf. Enscí ne éla endere nia steda y n bel dí da doman a Someda, sie ultim asconadour – fosc spié y embanì da zachei – é Riccardo Löwy, sia femena, sia sor y l cogné vegnus straportés via dai todesc y de ei ne àn mai plu sapù nia: na fin te n “lager” o poester se ài tout la vita sun l viade, degugn ne sà. Per Moena é chest na recordanza per dagnora desche testemone de valours de fradaia y de refude de vigni forma de violenza. Tl recordé Riccardo Löwy ne pòn nia se desmentié de sie fi Alberto Sommavilla “Berto de la Dimira”, personaje de gran umanité y dantaldut poet ladin de gran valour y dassen aprijé. Tres chesta scomenciadiva vuel la biblioteca comunala de Cianacei, te sie pice, porté dant n moment de recort dla Shoah ajache de dut chest ne rejonaràn mai assé. Duta la jent vegn envieda de cuer a chesta seira dal titul ” Tu passerai per il camino/Tu jiras su per ciamin“. (dv)
(0)Al ne me plej nia
(0)2 iadesc liet