Na ciasa de viere olàche i creps se spiedla
Cianacei à sen na ciasa dla cultura con ben 4 salfs per teater, chino, mujiga y encontedes
Te Fascia y dantaldut tl’auta Fascia a Cianacei y Ciampedel él sté n meis de dezember rich de abinedes, de manifestazions, de prejentazions de libri y auter che ti à dé na merscia a la vita soziala y culturala. Do la bela prejentazion di libri a Ciampedel tl cheder di 50 agn de recostituzion dl Comun y do la recordanza di 70 agn da la gran levina del Sas Becé a Cianacei en vender domesdì gran enaudazion dl nuef Kino Marmoleda.
Na ciasa dassen aspeteda da la comunanza y che ti darà sen l mued a Cianacei de podei avei na sala per chino con la poscibelté de podei porté dant scomenciadives de teater, de mujiga y auter. Bendebot de vare inant per duta la comunanza ma ence per cie che reverda l grumon de scomenciadives per i sciors che à finalmenter sales y strutures aldò. L chino nuef Marmoleda fova vegnú trat ju dant da cater agn y fat su danuef aldò dl projet dl architet da Trent Graziano Righi: na ciasa deforavia duta de viere che vuel tles intenzions dl architet se spidlé ti creps y ester dut un con l mond dles Dolomites entournvia. Daite les sales nueves, chela plu grana per films da 400 lueges y sotite na seconda sala, tres per films y seires de cultura, dlongia a na picera sala per scontredes y prejentazions de libri.
En vender da les cinch él vegnù taié la veta a la prejenza dl preve don Stefano, dl capocomun Fernando Riz, dl architet Graziano Righi y dl conseier ladin Luigi Chiocchetti da Moena. Te sala à duc podù vedei l splendour de chest chino nuef con n mobiliar prezious y dut cant funzional. De beles paroles à dit don Stefano che à benedì la strutura nueva. Daldò i saluc dl projetist Righi, dl capocomun Fernando Riz y dl conseier Luigi Chiocchetti. La seira é juda inant con n bel conzert de pianoforte, con n bon marendel sport a duta la jent ruveda adalerch y da seira con n film da Nadel. En sabeda seira do l prum apuntament con la rezitazion da Nadel fata dai bec dla scola popolara de Cianacei y con l coordinament de don Stefano. N suzes da vigni pont de veduda ma souraldut n suzes per la comunanza de Cianacei che à finalmenter sie teater y chino y sia ciasa dla cultura.
Domenico Volcan
(0)Al ne me plej nia
(0)3 iadesc liet