Ciamò n comentar sun la newsletter

Al fala vigni toleranza per idees desvalives dal “partí”

Ciamò valch consciderazions sun la esclujion de M. Costa dal viade tl’India y sun l clima politich te Sudtirol: prescions – recat – manaces

de Mateo Taibon

Cie figura che nosta classa politica fej: ala é zenza livel. Zenza cherianza, pòn ence enjonté. Y che al fala la cualité de n debatit politich, che al fala vigni toleranza per idees desvalives da cheles dl partì, ne desmostra nia demé chest caje particolar, ma la storia dl do-vera entiera. Culminé é l fenomen tla frasa – storica per sia fauzité ideologica, politica, etica, morala – che Alexander Langer fossa plu pericolous che i fascisc’.

       An podessa ence parafrasé chesta criminalisazion de Alexander Langer (a valgugn méssen fosc ti recordé che Alexander Langer n’á mai cometù nience l minim at criminal y n’á mai proponù o mazé tres mesures de assimilazion de na mendranza) y dit che la SVP é plu pericolousa che l fascism: l fascism dijova davertamenter che al volova assimilé i ladins. La SVP ne l dji nia, anzi, dij tres l contrar, ma la politica é juda de chest vers: epocala te sie senn nazionalist, te sie fondamentalism antiladin, la campagna longia y dura dla SVP per nia lascé permez tles scoles l lingaz ladin. Na parentesa: Vigni assimlazion, vigni fascism ence met man con l’esclujion de n lingaz da les scoles – y entratant che la scola todescia ti agn dla esclujion dal todesch vegn sacraliseda sciche Katakombenschule, vegn chi che se damanova y damana l ladin te scola metus fora sciche criminai, dantfora va l foliet de partì nia ofizial, la Dolomiten – y parentesa scluta.
       Defat, l lingaz ladin n’é nia prejent te na mesura azetabla tles scoles, con l resultat che l lingaz vegn rejoné dassen mel. La Rai ladina documenteia di per di chest status quo dejastrous, y á testimonié l dejaster, l’erojion dl lingaz él rodunt esponenc de chela “partei” che é dagnora juda con dut sie senn y sie despet contra l ladin te scola, tla aministrazion publica, ti media.
       An podessa ence recordé sciche al vegn dagnora metù fora sciche simbol dl mel l fascism; y lascé fora l nazism. Samben, chel totalitarism che á vedù n grum de südtiroleisc todesc (y ladins! nia demé Gherdeina n’à chilò na gran tacia foscia te sia memoria) sciche aiutanc fanatics de na politica criminala, vegn scuté via. L bilanz de doi agn de nazism é true piec de chel de 20 agn de fascism. Ma sun l nazism él gnù metù na coutra de chiet. Tl segn ence de n auter aspet de chesta ideologia nazionalista: volei assimilé i todesc é aldò de chesta ideologia l maiour crimen – nia ne conta chilò volei assimilé i ladins, nia ence desfé la comunité ebraica da Maran, nia ence mené vejins tl KZ. Südtirol n’à mai fat n ejam de coscienza per cie che reverda l nazism.
       Rodunt chesta classa politica fej l gran maester de morala can che ala va di autri. Na classa politica de n livel dret bas, dé dant da la strentura mentala, dal nazionalism todesch ence, da la tendenza da se lascé glorifiché y ester empermalousc per vigni picia critica. Che an vae contra la liberté de opinion de na persona privata, é bele da soul da daudé assé – vedú ence che chesta opinion ne n’à degun contegnù razist, filofascist o nazist (chel endere essa abù esternazions de politics dla SVP, i recordon l „Zigeunerspruch de Atz). Che an tole l’opinion dla persona privata per fé prescion sun na union culturala, á tant plu l tof de assolutism. Sonse pro la „Sippenhaft“ etnich-culturala? È chisc i prums varesc de na purga politica dles unions ladines?
       Tl capitul dla esclujion de Michil Costa dal viade tl’India él ence n auter particolar interessant: D’autres persones à ben podù jì empera. Enscì n imprenditour. O enscì ence – la Tageszeitung da encuei l scriv – l partner dla presidenta dl Consei provinzial. Ben, chel é sia bona rejon (nosta opinion n’é chilò nia valiva a chela dla Tageszeitung). Ma sce na persona ne ti plej nia al partì, pérdel si derc zivils – chesta la conclujion, sciche ence la rejon da fé pert de n viade che el s’à paié de sia gaiofa. N segn dl assolutism.
       Ma la cossa plu da daudé, y plu bassa, nia degna de oms zivilisés, é le contest dla prescion sun la Union Generela (y ence sun la Maratona dles Dolomites). L’auta gastronomia dla Alta Badia envieia a ceina (per la streda dla Val Badia). I politics é oramai duc ruvés adalerch. Con acompagnament. Ai vegn a ceina – al ne fossa pa persones che davagna puech, ma chilò ti va na critica ence a chi che envieia. Ma al en é ence laprò de chi che á te gaiofa n document privat de un di hotiei che envieia a la ceina. Y chest document privat (la newsletter de Michil Costa) vegn tout ca te chesta medema serada per fé prescion, recaté, proibì liberté d’opinion privata. Y chest zenza minima legitimazion – empruma dess chest partì scoé dant sia porta, remoné demez sie scich ideologich.
       Jí a scroché y tl medem moment la prescion, la manacia contra chel che envieia y sie certl. Chesta la bela cherianza de nosta classa politica. Can che la prepotenza arjonj n livel tant aut y la cherianza n livel tant bas, màncel ence les paroles adeguedes.