Chertes militares conta la storia dla pruma vera

Cartolines militares: n spiedl da enlaouta

L comun de Ciampedel mostra la pruma vera dl mond tres chertes militares da enlaouta

L Comun de Ciampedel, assessorat a la cultura y a la istruzion, l Istitut Cultural y l Museo Ladin de Fascia, adum al Museo dla Scola alpina dla Verdia de Finanza de Pardac, met a jì via per l meis de aost na mostra de chertes militares dal titul “Cartolines militares ilustredes y en franchija dla Gran Vera 1914 -1918”.La pruma vera dl mond à derené dassen ence les valedes ladines.

La mostra vegnirà metuda fora te sala de consei dla ciasa de comun de Ciampedel dai 8 ai 29 de aost y ala vegnirà daurida al publich entratant chest orar: 16.30-19.00/ 20.30-22.00 (entreda debant). Te n clima de colaborazion vizendoula vuel i trei enc promotours tres chesta esposizion porté endò la averda sun na gran tragedia che à metù sotissoura l mond ti prums agn dl secul passé, semenan dolour, meseria y mort. Te chest contest àn cialé de crié na esposizion de cartolines militares de chi temps che respidla les situazions dramatiches.
Tres na panoramica espositiva dalonc dai schems dl colezionism che carateriseia l setour dla interofilia y dla storia dla posta militara, vuelen mete a lum l’emportanza che la cherta ilustreda y en franchijia à abù endana l conflit souradut per chel che reverda les relazions anter i militars y sies families.
Souraprò vuelen, tres chisc reperc storics, sotrissé l peis storich-cultural che la cherta militara ilustreda à abù enlaouta y coche i paisc te vera à adoré les capazités artistiches di dessegnadours per sostegnì la propaganda de sia patria. La jent dles valedes ladines combatova enlaouta contra na anescion a la Talia.
La mostra vegnirà daurida en sabeda, ai 8 de aost 2009 da mesa les cinch domesdì.

Al me plej(0)Al ne me plej nia(0)

12 iadesc liet

Ortiede inant tres