La SVP: contribut, ma da rete con pert dla proprieté
L SVP vuel dutaorela avei n toch dla Cesa di Ladins, chela dl Museum de Gherdeina, per finanzié n sie ampliament – Interogazion dla lista LADINS al ombolt de Urtijei
Tl ultim numer dl sfuei de informazion comunal de Urtijei él scrit che l Consorz di comuns de Gherdeina (metú en pe per realisé laours deberieda) podessa ti damané al stat n contribut (aldò dla lege 482/99) per fé su na ciasa y ti la mete a desposizion al museum de Gherdeina. Patron dla ciasa fossa i trei comuns de Gherdeina unis tl consorz. N cont zenza l ost dla Cesa, la Union di Ladins de Gherdeina (ULG). Sun chesta chestion ti à la lista LADINS sen fat na interogazion al ombolt de Urtijei Ewald Moroder. Foto: entant na enconteda de raprejentanc dl MPL de Gherdeina con la ULG: da man ciancia Georg Moroder, Carlo Willeit, Adi Demetz y l president dla ULG Egon Vinatzer.
L Consei de comun de Urtijei ova bele fat fora a la unanimité ai 4 de agost dl 2006 de ortié inant tres l consorz di comuns de Gherdeina na domanda de contribut a la Presidenza dl Consei di Ministri a Roma per realisé l ampliament dla Cesa di Ladins a Urtijei. Al ne vegniva endere nia rejoné de lié chest contribut a dé ju na pert de proprieté da pert dla ULG. Chesta à bele plu iadesc dit de ester contra na tel ipotesa.
Dassen critics contra chesta prozedura de conzescion de contribut a “rete con na pert dla proprieté” se dij i conseiers dl MPL tl consei.
Ei ti ova metù dant al consei bele de jugn dl 2006 na tel mozion, dijan che i trei comuns de Gherdeina dess fé la domanda a Roma, ma nia che la Union di Ladins de Gherdeina (ULG) dess ti dé ju a rete pert dla Ciasa di Ladins o na ciasa nueva al consorz sun chest terac.
“Con chisc prinzips ne sonse nos nia plu a una” végnel dit tla interogazion maneda ite chisc dis al ombolt Ewald Moroder dal MPL. “Deguna furnadoia y degun hotel che giata finanziamenc da la provinzia mess ti dé ju azions o porzions materiales a la provinzia per i contribuc che ai giata”, végnel sotrissé tla interogazion. I conseiers di Ladins recorda ence che l ultim engrandiment dl Museum de Gherdeina a Urtijei dl 1986 fova vegnú finanzié en gran pert da la Comunité de Val Sauten/Scilier zenza ghiranzes a la ULG de messei dé ca n pice o n gran toch a zachei. A la fin vuel i conseiers savei, sce l consorz à mané inant la domanda.
Al me plej
(0)Al ne me plej nia
(0) 2 iadesc liet
