Caje Michil Costa, president dla Union Generela

Willeit a Michil Costa: “Nos damanon na spligazion y scuses ofiziales”

Na gran daudanza per la Union Generela y na ofenuda dl Moviment Ladins y de duc I Ladins

Ai 11 de jugn à l president dla Union Generela, Michil Costa, dessegné te na intervista a la Tageszeitung na comunanza ladina che é chilò per se ralegré de sies montes, de sia spiritualité, de si afars y per jí fora per l mond a se daurí, a vedei, a emparé i ne sà nia cie. Do valch domandes tres plu curiouses dl jornalist sauta Michil Costa fora de n saren via sun l Moviment LADINS, i paradlan con i talebans, n moviment islamich che à governé gran pert dl Afganistan dal 1996 al 2001, copan y martorjan a inom de na vera santa. O che Costa ne sà nia cie che i talebans é o che al ne sà nia cie che i LADINS é.

Dal Sassicaia a la parola pesocia de “Taleban”, la persona de mond Michil Costa. I LADINS s’aspeta spligazions y scuses ofiziales denant che cialé plu inant al fat dassen desplajoul.

Te entramidoi i caji él na daudanza per la Union Generela di Ladins dles Dolomites y na ofenuda dl moviment LADINS y di Ladins enstesc (passa 4000 à ciamò lité LADINS da les ultimes lites provinziales y passa 1000 à lité LADINS da les ultimes lites comunales demé te Gherdeina). De fanatism ne él mai nience sté l’ombria pro i LADINS. L sospet che do les paroles de Costa via se ascónel na cossa programeda o aconsieda da d’autri é almanco tant gran che la legreza che ti vegn fata a chi che ne dura nia i ladins con na sia identité cuturala y soziala y fej de dut per i despartí y i endeblí. I LADINS s’aspeta spligazions y scuses ofiziales denant che cialé plu inant al fat dassen desplajoul.

Carlo Willeit