Te n ann ence la provinzia de Belun vegnirà clameda endò a jì a lité da nuef sie govern provinzial
de Lorenzo Soratroi
Al sarà les prumes lites do che al é vegnù aproé la lege cheder nazionala sun les mendranzes, do che l consei provinzial de Belun á definì ciugn che é i comuns ladins. Al se deura spo la chestion de chi che sarà l raprejentant ladin tl consei de palaz Piloni. Na chestion ciauda che ne manciarà dessegur nia de daurì discuscions nueves anter les does “frazions” ladines ( ma nia ne dij che per na cariera te provinzia, ne se deurel nia ence de autres chestions de ciampanil te na realté conesciuda desferenta ). Dessegur él demé che per i ladins dla provinzia de Belun ne esìstel deguna istituzionalisazion de sie raprejntant tl consei provinzial, coche al suzed respetivamenter tles provinzies de Trent y Bulsan.
Chichemai che se prejentarà sciche portaousc dla mendranza l fajarà demè a titul personal o percie che metù su “en pectore” da valgunes assoziazions ladines o partit che se sogarà la “cherta ladina” per giaté valch ousc emplù. Al vel da soula la consciderazion che al sarà rie da vedei raprejenté i ladins a Belun y chest per trei motivazions. La pruma per na chestion storica y de fat anter les does realtés ladines. Al sarà rie che propi la politica ruve a na unificazion de intenc, canche la divijion esisteia bele a livel cultural y de identité. La seconda per na chestion tecnica. I 38 comuns definis ladins ne viv nia te n colege lital unich. Na situazion che lieia endere adum ciamò n iade demè i trei comuns che da temp ova otegnù de ester adum te chel che oramai an pò conscidré l “colege ladin storich” dla provinzia de Belun (con dut chel che sta viadedò a chesta definizion ). La terza chestion é che al ne esist nia na frazion politica ladina ofiziala ( for che al ne vegne nia resuscité l’UALCAF ). Na chestion daverta spo, che se prestarà a mile interpretazions sun chel che a bon titul podarà se conscidré l raprejentant ladin. L’imprescion,y chela resta, é de vedei che ence chest iade la soluzion sarà chela touta per l Istitut Cultural. (if)
(0)Al ne me plej nia
(0)2 iadesc liet