Les lites parlamentares y les posizions dla lista Ladins
I litadours dl MPL vegn enviés de lité do coscienza – N comentar de Carlo Willeit
COMENTAR
L temp fova curt, ma sce i movimenc politics LADINS y UAL ne se à endut nia muet, per sie cont almanco, é chest n segn che al mancia na mioura relazion anter i movimenc y che la dependenza politica di ladins regneia con pesc inant. 
L MPL, tres sie president Adi Demetz (foto a manciancia) renoveia l apel ai partis che candideia al Parlament y govern nuefs de mené a bon fin la agregazion di trei comuns ladins de Belun a la Region Trentin Sudtirol y de asseguré na raprejentanza ladina tres na lege litala nazionala da endoman.
Dessegur él ence la lege litala che deida i gragn a Roma, Trent y Bulsan, ma i ladins ne messessa empò nia se arjumé via la ocajion da lité deberieda a livel de Region, cie che se lasciassa fé pro les lites dla Ciamena. Per ti dé lerch ai ladins tla lege y tla lita val clermenter debujegn di ladins organisés ence ti autri partis de maioranza y oposizion. La ousc dla oposizion ne vel endere mai manco de chela dla maioranza ajache propi ela fej da segurté a la democrazia y defen les mendranzes. Duc chier oujes pro i ladins, ma puec y degugn i deida tegnì adum per arjonje enstesc sia raprejentanza. Anter i partis à demé la “Union für Südtirol” envié les oposizions todesces y l moviment politich LADINS a se scluje adum pro les lites nazionales per crié na alternativa plu sterscia , ma la cossa ne é nia ruveda a bon fin. Enscì jironse a lité en domenia zenza de gran speranzes che al se mude valch per nos; speron almanco che l stat ciafe n govern con de miours temps. L’autonomia provinziala che mess fé segurté pro vigni lita ne é nia en pericul. Plutost é la democrazia, la dreta despartizion dla richeza, la segurté dl laour y dla ciasa, i valours dla familia y dla persona, les medemes rejons culturales y soziales di grups linguistics sun la stadiera de na mioura politica nazionala y provinziala da endoman. |
L catalogh de ghiranzes dla UGLD sourandé al president dl govern da enlaouta, Prodi, vel ence per l MPL per cie che reverda la sconanza dla mendranza ladina da unifiché tla region Trentin Sudtirol. I amisc y sostegnidours dla LL liteia lediamenter do sia coscienza y conescenza per plu giustizia, manco burocrazia, plu laour, manco coutes, plu segurté y plu familia.
(0)Al ne me plej nia
(0)4 iadesc liet