Alpins de Fodom sun Col de Lana

Alpins y scizeri ladins a recordé i tomés te vera

L Col de Lana, n luech olà che duc pò se enconté, obietif soul: la pesc, ma al ne é nia tant saurì

de Lorenzo Soratroi

(if) La bela giorneda da soredl che à caraterisé la pruma domenia de aost à dessegur envueié truepa jent a se abiné sun Col de Lana, per la comemorazion oramai tradizionala di saudés tomés te vera. La zerimonia metuda a jì da n grup de alpins da Fodom é scomenceda da les 11 con la Messa lieta dal capitan don Gianpaolo Mementi, capelan militar a Bulsan. Adum al ombolt Ugo Ruaz y al president dla sezion di alpins de Belun, Arrigo Cadore. Sun Col de Lana fòvel ence na raprejentanza dl 24′ Hochgebirgsbatallion de Lienz vestis con la mondura ofiziala dl eserzit austriach. I militars à volù ester colassù, ajache i alpins fodoms fova jus d’aisciuda a la comemorazion dla mina dl Col de Lana, che vegn tegnuda vigni ann ai 17 de auril a Lienz.

I raporc anter alpins y Kaiserjäger fova stés te chela ocajion scialdi bogn, tant che ence les autorités locales é stedes contentes de avei vedù sfilé adum chi ciapiei con la pluma che dant nuevanta agn se sclopetova decontra su per Col de Lana. N segn che i temps se muda, che na coscienza nueva se fej inant, soura i confins y che ciala endò a la storia con n puech plu de obietivité. “I son content de avei abù chesta raprejentanza te chesta giorneda “ à dit Valerio Nagler, capogrup di alpins fodoms “ enscì fosc scomenciaràn a stopé via y cujì ite les polemiches vegnudes fora dant valgugn agn sun Col de Lana con i Scizeri.” L Col de Lana encueicondì tant recordé te convegns y referac, essa dapò da deventé defata n luech olà che duc pò se enconté, vignun con sia mondura, con sia storia, sia identité, ma duc con n obietif soul: la pesc.

Al me plej

(0)Al ne me plej nia

(0)

1 iadesc liet

Ortiede inant tres