Al é tant truep da fé

Doestrei domandes a Albert Pizzinini, president de LADINS DOLOMITES.
Do n temp curt de crisa do les lites provinziales se à Ladins Dolomites reorganisé danuef, ciugn é pa i proscims obietifs?
Al é tant truep da fé ence demé a livel de Sudtirol che te pueces lignoles ne ciafiaréi nia auter che fé na picera sintesa de cie che i nes on tout dant.
Dantaldut vuel Ladins Dolomites sensibilisé la jent ladina de se enteressé deplù y plu avisa de temesc politics. Demé tres na majera sensibilisazion pòl se endespré n majer sostegn per Ladins Dolomites. Per cie che reverda i obietifs él da desfaranzié anter chi de veduda curta y chi de veduda longia.

Tla veduda longia laoronse per na mudazion dl statut de autonomia per ti garantì na maiour sconanza y raprejentanza ai ladins: raprejentanza di ladins tla Comiscion di 6 y di 12, raprejentanza ladins te  signoria, proporz elastich, independenza dla scola ladina (la nomina dl intendent ne pò nia ester politica), repartizion dles ressurses a livel local en basa a les coutes paiedes ite (l model che vel per Sudtirol mess daite de Sudtirol valei tamben per i ladins) aladò dl prinzip de sussidiarieté. Obietif é ence chel de n certl lital ladin sibe per les lites provinziales che nazionales y tamben europeiches, sciche n assessorat garantì a livel provinzial. En plu adoronse n lingaz scrit unifiché per i ac aministratifs y i nes baton per plu democrazia direta.

{xtypo_info}Clicheia medré sun la pruma foto dessot per fé na raida dles fotos engrandides con spligazions te chest articul! Clican sun l buton „play“ se mùdeles ju da soules. {/xtypo_info}
Per cie che reverda i obietifs de curta veduda messonse desfaranzié les ativités de control da la funzion de fé propostes. I nes on tout dant da ne lascé nia plu pro l burtl viz dla SVP de se fé i enteresc privac. Per Ladins Dolomites mess ester duc unfat.
En plu ti stonse dret do a la chestion dla viabelté con la realisazion dles zirconvalazions de uega y dl finanziament da pert dla Provinzia.

Ai 8 de mei à Ladins Dolomites lité l diretif nuef con Albert Pizzinini a cef, prum a man ciancia.

Ampliament dles trasmiscions dla Rai ladina, proporz elastich, 1 n raprejentant ladin tles comiscions de majera emportanza a livel provinzial, assessour de dert y nia de plajei. Carlo Willeit ova batù agn alalongia. Co voleise pa vos sburlé inant?
De chest vers aspetonse respostes concretes da Bulsan. En plu ti stonse do a la chestion dl finanziament dla Ciasa di Ladins a Urtijei, a la majera prejenza di ladins ti media, sciche ence al aspet sozial con na majera sconanza per les families y les persones che per gaujes desvalives é ruvedes tla pecugna, desche ence a na majera efizienza tl setour sanitar, olàche an ne pò nia aspeté meisc alalongia per na vijita o messei paié sun dut l ticket. Per cie che reverda l muet de compra laoronse per la costituzion de grups de compra per podei sparagné. Plu inant nes onse tout dant de devenje la speculazion fabricala y la desvenuda a folestiers de terac y de ciases. Sotrissé volessi ence l aspet dl svilup turitisch dl vers dla cualité plu che dla cuantité.
Carlo Willeit se à batù dret dassen per chestes chestions y nos varion inant sun chesta streda. Concretamenter pò chest demé vegnì arjont tres de bogn contac a Roma. De chest vers él da dì che Ladins Dolomites pò fé a Roma plu che la SVP che é steda bendebot encompra ti raporc politics. Al và debujegn da dì che la SVP mess lascé de mete rams anter les rodes. Sce ala ne essa nia fat demeztroi chest, fossa chisc obietifs bele vegnus arjonc tla legislatura de Carlo Willeit.

Ves enjigneise ca per les lites comunales?
Per cie che reverda les lites comunales onse defata na reunion de diretif ai prums de setember. La situazion politica é desfarenta te Gherdeina che é plu politiseda che la Val Badia olàche en gaujion de lites comunales stàn plu gen sun listes ziviches. Aladò dla situazion saràl l sourastant de comun adum al comité de comun che messarà tò la dezijion co se prejenté. Al và debujegn da dì che a livel comunal ne pòn nience fé a manco de chi candidac che ne vuel nia se aclapé pro n partì, ma che vuel empò fé pert dla aministrazion de comun y chest realiseien plu saurì tres listes ziviches. Cie che i é da dì él che Ladins Dolomites se prejentarà con na scuadra de persones motivedes y competentes che vuel laoré per l ben dla comunité y no per sie enteres personal.

Co é pa l con la Union Autonomista Ladina UAL y sie raprejentant regional Luigi Chiocchetti …
La UAL (Union Autonomista Ladina) à abù n moment de transizion do l suzes lital per la nomina dl diretif nuef. I cialaron de organisé na enconteda con la UAL per avei na majera colaborazion politica anter les valedes ladines. I contac che i on bele abù con l diretif vedl fova te n clima de gran colaborazion y i nes aodon che ala posse jì inant enscì.

Souramont y referendum …
Ladins Dolomites é per l respet dla volonté di litadours di trei comuns ladins de Anpezo, Col y Fodom de passé sot a la provinzia de Bulsan.

Ti ultims dis végnel rejoné dla senta UNESCO, ciuna é pa Vosta proposta?
Per cie che reverda la UNESCO é stés Ladins Dolomites i prums che à ghiré la senta tla Ladinia. Anter l auter ti éi fat chesta proposta al minister ai Interns, Roberto Maroni, entratant la meisa torona ai 3 de messel a Bulsan. Sen él competenza di ombolc de se mete a una per la senta. Scialdi duc à fat de beles propostes, medré che sen vuelel ester unité.

 

 

 

 

 

 

{2jtabs_plugin 2}

{jcomments on}

869 iadesc liet