Verena Trolese á davagné de messel
En domenia, ai 1 de aost, seconda preselezion – Gran program de cornisc con roda entourn Plan de Corones denant
Al Plan ti á dé per la seconda outa l benodú al concurs de beleza plu conesciú encantourn, la selezion de MISS ITALIA. Na pruma defileda sun paion é bele steda ai 17 de messel per la selezion dla Miss Adesc Aut. La proscima, chela veramenter clef, vegnirá tegnuda en domenia che vegn, ai 1 de aost, sun plaza de gliejia d’Al Plan. Te chesta gaujion vegnirál selezioné les does joenes che jirá a la prefinala y a la finala de Miss Italia a Salsomaggiore Terme tl meis de setember 2004. L ann passé ova les vicentines Elisa Martini y Erica Panizzon fat la plu bela paruda. Chesta outa á davagné la selezion provinziala a Al Plan Verena Trolese de Bulsan, chilò sun la foto adum a la presentadessa Sonia Bernardi y al vize-president dl’Assoziazion Turistica d’Al Plan Werner Call.L program che encertleia la selezion de chesta domenia che vegn, ai prums de aost, met man da les 17.30 con na roda dles concorentes sentedes te oldtimers entourn Plan de Corones. Da les 18.30 architaráles con si ciaférs a Bornech per fé reclam per la seira dla selezion a Al Plan che met man da les 21.00. Tla giuria che litará la “plu bela” él anter d’autri i conescius fredesc schiadours maroi: Manuela y Manfred Mölgg y Gerhard Kohlgruber, conesciú de plu desche Mister “Tschusto” o Giusto tla televijion taliana per sia pronunzia a la todescia.
Al me plej
(0)Al ne me plej nia
(0)
(0)Al ne me plej nia(0)2 iadesc liet