A pruma odleda na encunteda envieda via da la Region ….

 

Envic dla Region Trentino-Südtirol, dedò comunicat dla  JG-SVP ladina, trueps se à sentì strumentalisés dai gherdeines

 

Dant da n per de dis él ruvé adum a S. Linert de Badia  sun envit dl president dla Region Franz Pahl n pice grup de persones per rejoné sun “Gespräche über Ladinien”. Enchina chilò dut bon y dret. Ma la chestion contegn n aspet dret interessant che auda da vegnì dit, davia che valgunes persones se à baudié do che ai à odù  la cossa tla stampa con ei sun la fotografia: l’envit a la “roda de discuscion” é vegnù scrit y menè fora sun papier intesté dla Region Trentin-Südtirol, ma enultima é duta l’enconteda vegnuda venuda a la stampa sciche na scomenciadia dla JG tla SVP ladina. Valgugn enviés, che ratova che al fossa sté na iniziativa interessanta dla Region, é restés a bocia daverta, desplajus y se à sentì strumentalisés, liejan dedò l comunicat politich con foto di joegn tla SVP. Sun l retrat: l Pesident Regional Franz Pahl. Al à ortié fora i envic sun papier intesté dla Region. La marevueia: al à tres endò sostegnì le ladin standard, rie da capì che al fossa sté a una con n tel comunicat. Valgugn entorj les cosses.

Da persones che à tout pert dla Val Badia él vegnù dassen baudié de chesta stromentalisaziun y ai se destanzieia perchel tla maniera plu assoluta. Baudié él ence vegnù de co che esponenc jogn dla SVP de Gherdeina s’empermet da giudiché sun tematiches culturales (lingaz unifiché, toponomastica, scora y ii) zenza avei gonot n minim d’ informazion de basa. Propostes de chest vers, fates entratant l’enconteda ne é daldut nia vegnudes dedes inant tl comunicat dla JG. Valch un di presenc s’à ence fat demarevueia co che Franz Pahl fej da sostegnì la posizion dla SVP jona en cont dl ladin unifiché, sce an pensa che propi el à dant da puec meisc daidé dè fora adum a la vizepresidenza ladina (Carlo Willeit) l statut d’autonomia te ladin standard. Che le President dla region se lascia ite te de tel juesc tant bonmarcé à fat marevueia. Ma l cont per avei strabacè l’enconteda a na tel maniera ti restarà bonamenter da paié a Christohp Perathoner y si colegs de Gherdeina (JG dla SVP), cun chi che i badioc ne se lasciarà nia saurì ite n secund iade. (tb).

2 iadesc liet