50 agn Cesa di Ladins a Urtijei – valch fora dla storia

La Cesa di Ladins dal 1954 al 2004

Dl 1978 y dl 1983 él bele vegnú fat ampliamenc, sen fóssel endò debujegn – Dutaorela nia sclarida la chestion dl finanziament

Pernanche la seconda Vera Mondiala fova fineda y les does ditatures, che ova per agn alalongia comané te nosc luesc, fova desmetudes, podova la liberté y la democrazia endò pié pé. Les raijes dl ladin ne fova ciamò nia secedes, ma ales podova endò revive y se lascé vedei. N valgugn ladins se à abiné y à defata metù su la Union di Ladins de Gherdeina. L Consei messova tl prum se abiné privatamenter o te valch ostaria. Al fova scialdi debujegn de avei na senta per podei laoré inant. Enscì àn scomencé a se cruzié, ma co fé zenza mesi finanziars? N valgunes persones de gran ardiment y de gran scomenciadiva con a cef l president da enlaouta bera Franz Prugger con l aiut finanziar de bera Giuvani Stuflesser de Petlin y dla Union Generela di Ladins, á brancé ite la chestion.

Ei à enrescì de n terac adaté tl zenter de Urtijei che fova dles andes Maria y Malia da Brida. Marciadan empera ései vegnus a una y à podù ti l compré ju a n priesc de cinch milions de lires. Per podei scomencé i laours à cater comembri dl consei dla Union di Ladins: Franz Prugger, Vinzenz Aldosser, Heinrich Moroder de Doss y Bruno Moroder messù fé segurté y tò su n debit pro la Cassa dl Sparagn. Canche les autorités s’à entenù che i ladins la minova per dassen, ài vedù ite che al jiva debujegn de ti sporje na man. Ai 6 de messel dl 1952 á scomencé, con l aiut dles autorités y tamben de privac, la storia dla «Cesa di Ladins» con muré ite n document sun chel che al é scrit, anter l auter: “L ann de nost dl signour 1952 sot al Govern de A. Degasperi y con la partezipazion dl President dl Consei di Ministri, dl Comissar dla Region y de truepes autorités che é ruvedes adalerch à Sn. plovan Engl Comploi benedì l prum sas dla Cesa di Ladins (sandì de Segra de Urtijei, 6 de messel). L document é vegnù sotescrit da dutes les autorités che fova ilò y che se scluj ju a la fin con ”La Cesa di Ladins vuel salvé, tegnì su, svilupé y tramané inant la cultura ladina.”
Doi agn dedò, ai prums de agost dl 1954, àn podù fé la gran festa de inaugurazion y benedescion dla ciasa fineda. La firma Decas á fat i laours de costruzion. L legnam per corí l tet é vegnù sport permez dal Comun de Urtijei. D’autri finanziamenc é vegnus conzedus da la Region y da la Presidenza dl Consei di Ministri de Roma. L fabricat à costé enlaouta 48.271.653 de lires. Sen podòven finalmenter scomencé a laoré tla ciasa y ala é ence riesc vegnuda nuzeda: la sala con l paion, la biblioteca, i salfs per la zaita ladina, per radio ladin, i ofizes y e.i. Ai set d’agost dl 1960 él vegnú inauguré y daurì l Museum de Gherdeina.

Con l passé di agn fòvel endere na tel strentura che an à messù pensé a n ampliament. Tl ann 1978 éla vegnuda engrandida per ti fé lerch al museum, a la biblioteca, a la sala dla conferenzes y al teater. L’ativité culturala ladina jiva inant y for miec y an á endò messú pensé de enjonté valch local per podei laoré desche al auda. Tl 1983 àn auzé la ciasa, davagnan na majera lerch per l museum, per la Union di Ladins y de per d’auter.
Sen él passé 50 agn. La Cesa ti á dé truepes poscibeltés ai ladins de laoré per sia comunité y al é vegnú derzé fora truep. Ma sen ésen endò tant inant che an adora de plu lerch y chel é dagnora n bon segn. An spera che les autorités y dantaldut l comun veide ite l laour che é vegnù fat y ti dae aldò na man, a na moda che la Union di Ladins posse laoré inant per l ben dla jent ladina de nostes valedes.

Gilo Prugger

Festa per i 50 agn dla Cesa di Ladins
50 agn Cesa di Ladins a Urtijei: restruturazion

Al me plej

(0)Al ne me plej nia

(0)

2 iadesc liet

Ortiede inant tres