Degöna Santa por ladin

Le vësco Golser en gaujiun de süa consacraziun.Le vësco Golser en gaujiun de süa consacraziun.

Püch dan Nanü dal 2016 él gnü metü ia tal dom da Porsenú le vësco Karl Golser ( 1943 – 2016). Al ea pormó gnü consagré vësco dal 2009. Le vësco Golser s’an â tosc sintí dla borta maratia Parkinson co l’â sforzé amez isté dal 2011 da dé les demisciuns; da danlò encá l’án ma plü odü dainré, deache la maratia jea debota ennant, mo empó la á la maratia tichené por cin agn alalungia cina ala mort en Nadé dal 2016.
La Curia á lascé fa santes da mort por le vësco Golser; al n’è rové fora te vigne dlijia. Ares é scrites por todesch y por talian, le ladin án lascé de na pert. Al ea gnü dit che sce an ess tut trei lingac, danló foss döt le test sön na plata sora gnü massa pice; mo chê dij pa che an ne ess nia podü se vaighé na secunda plata y fà la santa – se tratera pö de n vësco – empü maiú con endöt 4- 5 plates con val‘ ater pensier religius laprò? Karl Golser è ince sté vësco dai ladins y porchël essel aldí da scri la pilora da mort ince por ladin! Na pert mina tres che an pois ignoré i ladins ma deache ai é la plü picera mendranza! Rodunt porchël essera debojügn de na sconanza cotan majera. Le lingaz ladin é ince önn dai trëi lingac aministratifs tla provinzia da Balsan y porchël aldissel da gni adoré le ladin avisa desco i atri dui y nia gni dër gonot ignoré. I speri che na te‘ “ desmunciada dal ladin “ ne sozedes nia plü!
Le vësco Golser è sté a Oies a fa festa, mo ince da püre él roé sö Oies adascusc por perié Sant Ojep da Oies che al le dëides soporté la maratia. Ince a La Pli è le vësco Karl Golser sté a benedí l’alté nü de dlijia che l’artist Franz Kehrer á fat. Iö arati che le vësco Golser, al ea dër davert al modern, ess ince azeté l’alté che l’artist Lois Andidalfarei â fat por la dlijia ploanala de San Michîl a Porsenú; la comisciun ea pö metüda sö dala Curia y stada döta a öna por l’alté dal artist ladin,mo al manciâ le bunarat da lassö jö. Che le vësco Golser palses tla pêsc dl Signur! 

Lois Trebo

Al me plej(4)Al ne me plej nia(0)

492 iadesc liet

Ortiede inant tres

1 n comentar a revert de "Degöna Santa por ladin"

  1. Erwin Valentini | 16/01/2017 da les 15:55 | Respone

    Les vertoles per ne adoré nia l ladin é truepes, ence anter jent de gleijia.

    Al me plej(1)Al ne me plej nia(0)

Scrive n comentar

La miscion e-mail ne gnirà nia publicheda.


*