14eisema enconteda dles lies da mont: i ampezans envieia
25 de jugn 2006: les lies da mont ladines se enconta su da la utia de Croda da Lago via n’Ampez, da les 10.00 inant
Chest ann él la outa numer catordesc che les sezions dl CAI dles valedes ladines entourn l Sela se ciata, tradizionalmenter la ultima domenia de jugn y a rode, su per valch bela mont a fé na fré de festa deberieda sot a les crodes, anter amisc, zenza mete amez politica y rejiaries, ma demé per se ciaté anter jenc a chi che al ti plej jí tla natura, jì a creps, fé ferates y che se dà da fé a na moda che i trois y l ambient sie dagnora nec y segurs.
L lech soul soulent de Federa con viadedò la Croda da Lech.
La organisazion dla catordejeisema giorneda ti toca chest ann a la Sezion d’Anpezo che à enjigné ca dut a fé vegnì i amisc dl’Auta Fascia, da la Val Badia, da Fodom, da Gherdeina, da Moena, Poza de Fascia y da San Vido, y duc chi autri che arà plajei de ester a la pert, su da la Utia Croda da Lago, en domenia ai 25 de jugn 2006. An se abinarà su da la utia sun l our dl Lech de Federa da les diesc a bonora; da les undesc tegnirà messa Don Matteo Colle, joen capelan d’Anpezo. Dedò vegniràl a parola zacotant de autorités dl CAI y dapò podaràn marené duc adum, daite o defora da la Utia. La giorneda, sce l temp se ouj al bel, jirà inant enfin canche al é ora de dé outa a ciasa. Les sezions dl CAI de Anpezo, ogheda (=avisé,arvene, vidé) dl 1998 dal dotour Federico Majoni, ova enjigné ca per la pruma outa la giorneda con les sezions ladines dl CAI, ai 24 de jugn dl 2001 su en Novolou. Enlaouta fòvel na bela giorneda da soredl, y da la piza plu “panoramica” de duta la val d’Anpezo se ova duc godù n belvedei che al fova na marevueia, y duc se l arà dessegur tegnù ti uedli y tla recordanza. Al fossa bel che chest ann la giorneda fosse valiva o miec che enlaouta y che sun Croda da Lago duc i amisc dles sezions dl CAI vegnus ca pro podessa passenté n valgunes de beles ores deberieda te nostes Dolomites! (em)
(0)Al ne me plej nia
(0)